ठाणे : ठाण्यातील शंभर वर्षांचा गौरवशाली इतिहास लाभलेल्या ‘ऑफिसर्स क्लब’ला आता आधुनिकतेची नवी झळाळी प्राप्त झाली आहे. प्रशासकीय अधिकाऱ्यांच्या आरोग्य, क्रीडा, मनोरंजन आणि परस्पर संवादाला चालना देण्याच्या उद्देशाने या ऐतिहासिक वास्तूचे सर्वांगीण नूतनीकरण करण्यात आले असून, या नूतनीकृत क्लबचे उद्घाटन उपमुख्यमंत्री एकनाथ शिंदे यांच्या हस्ते ८० व्या स्वातंत्र्यदिनाच्या विशेष प्रसंगी मोठ्या उत्साहात पार पडले. अनेक दशकांपासून ठाणे जिल्ह्यातील प्रशासकीय अधिकाऱ्यांसाठी महत्त्वाचे केंद्र म्हणून ओळखल्या जाणाऱ्या या क्लबने काळाच्या ओघात आपली ओळख कायम राखली असली, तरी आधुनिक गरजांनुसार त्याचे रूपांतर करण्याची आवश्यकता होती. याच पार्श्वभूमीवर क्लबचा संपूर्ण कायापालट करण्यात आला आहे. ऐतिहासिक वारसा अबाधित ठेवत त्याला आधुनिक सुविधा, आकर्षक अंतर्गत रचना आणि दर्जेदार क्रीडा व आरोग्यविषयक सुविधा उपलब्ध करून देण्यात आल्या आहेत. प्रशासकीय कामकाजाच्या धावपळीमुळे अधिकाऱ्यांवर मोठा मानसिक आणि शारीरिक ताण येत असतो. हा ताण कमी करण्यासाठी, अधिकाऱ्यांना निरोगी जीवनशैलीकडे प्रवृत्त करण्यासाठी आणि विविध विभागांतील अधिकाऱ्यांमध्ये सुसंवाद वाढविण्यासाठी या क्लबची नव्याने उभारणी करण्यात आली आहे. उद्घाटन सोहळ्यावेळी उपस्थित मान्यवरांनी या उपक्रमाचे स्वागत करत, अधिकाऱ्यांसाठी अशा सुविधा उपलब्ध होणे ही काळाची गरज असल्याचे मत व्यक्त केले. शंभर वर्षांचा इतिहास असलेल्या या वास्तूला आधुनिक स्वरूप देताना तिची ओळख, परंपरा आणि ऐतिहासिक महत्त्व कायम ठेवण्यात आले असून, वारसा आणि आधुनिकता यांचा सुंदर संगम या नूतनीकरणातून साधण्यात आला आहे. त्यामुळे हा क्लब केवळ विश्रांतीचे ठिकाण न राहता अधिकारी वर्गासाठी प्रेरणादायी आणि सर्वांगीण विकासाला चालना देणारे केंद्र ठरणार आहे.
नूतनीकरणानंतर ऑफिसर्स क्लबमध्ये अत्याधुनिक बॅडमिंटन कोर्ट, टेबल टेनिसची सुविधा, बिलियर्ड्स टेबल, आधुनिक उपकरणांनी सज्ज व्यायामशाळा (जिम) तसेच प्रशस्त आणि आकर्षक कॅफेटेरिया उभारण्यात आला आहे. या सुविधांमुळे अधिकारी नियमित व्यायाम, क्रीडा स्पर्धा, मैत्रीपूर्ण संवाद आणि विविध उपक्रमांमध्ये सहभागी होऊ शकतील. ठाण्याचे जिल्हाधिकारी तथा ऑफिसर्स क्लबचे अध्यक्ष डॉ. श्रीकृष्ण पांचाळ यांनी अधिकाऱ्यांना या सुविधांचा सक्रिय वापर करण्याचे आवाहन करत, हा परिसर आरोग्य, क्रीडा आणि सकारात्मक संवादाचे चैतन्यमय केंद्र बनविण्याचे उद्दिष्ट असल्याचे सांगितले. त्यांनी स्पष्ट केले की, शतकभराचा वारसा जपत या वास्तूचे नूतनीकरण करणे हे अत्यंत आव्हानात्मक काम होते. जुन्या वास्तूची ओळख कायम ठेवत आधुनिक सुविधा उपलब्ध करून देण्यासाठी सार्वजनिक बांधकाम विभाग, क्रीडा विभाग आणि इतर संबंधित यंत्रणांनी नियोजनबद्ध पद्धतीने काम केले. दर्जेदार साहित्य, आधुनिक तंत्रज्ञान आणि वेळेचे काटेकोर नियोजन यामुळे हे काम यशस्वीरीत्या पूर्ण झाले. या नूतनीकरणासाठी परिश्रम घेतलेल्या सर्व अधिकारी, अभियंते, कर्मचारी आणि संबंधित विभागांचे यावेळी विशेष कौतुक करण्यात आले. उपमुख्यमंत्री एकनाथ शिंदे यांनीही अधिकाऱ्यांचे आरोग्य आणि कार्यक्षमता वाढविण्यासाठी अशा सुविधा अत्यंत महत्त्वाच्या असल्याचे नमूद केले. त्यांनी प्रशासकीय अधिकाऱ्यांनी या क्लबचा अधिकाधिक उपयोग करून निरोगी जीवनशैली स्वीकारावी आणि परस्पर सहकार्य व समन्वय अधिक मजबूत करावा, असे आवाहन केले. या नव्या सुविधांमुळे ठाणे जिल्हा प्रशासनातील अधिकारी एका दर्जेदार आणि आधुनिक व्यासपीठावर एकत्र येऊ शकणार असून, त्यांच्या दैनंदिन कामकाजातील ताण कमी करण्यास तसेच संघभावना वाढविण्यास मदत होणार आहे. यासाठी पुढाकार घेतल्याबद्दल जिल्हाधिकारी तथा ऑफिसर्स क्लबचे अध्यक्ष डॉ. श्रीकृष्ण पांचाळ यांचे प्रशासनातील अधिकारी आणि कर्मचारी यांनी विशेष आभार मानले. शतकभराचा वारसा जपत आधुनिकतेची कास धरणारा हा नूतनीकृत ऑफिसर्स क्लब भविष्यात प्रशासकीय अधिकाऱ्यांसाठी आरोग्य, क्रीडा, संवाद आणि सकारात्मक कार्यसंस्कृतीचे महत्त्वपूर्ण केंद्र म्हणून ओळखला जाईल, असा विश्वास यावेळी व्यक्त करण्यात आला.
