मुंबई : त्वचा गोरी करण्याचा किंवा चेहरा उजळविण्याचा दावा करणाऱ्या सौंदर्य प्रसाधनांचा वापर करणाऱ्या ग्राहकांसाठी महत्त्वाची बातमी आहे. अन्न व औषध प्रशासनाने (एफडीए) प्रयोगशाळेतील तपासणीनंतर महाराष्ट्रात तीन ब्युटी क्रिम्सच्या विक्री, वितरण आणि वापरावर तातडीने बंदी घातली आहे. तपासणीत या सौंदर्य प्रसाधनांमध्ये पारा (मर्क्युरी) आणि शिसे (लेड) यांसारख्या अत्यंत विषारी जड धातूंचे प्रमाण सुरक्षित मर्यादेपेक्षा लक्षणीयरीत्या जास्त असल्याचे आढळून आले. आरोग्य तज्ज्ञांच्या माहितीनुसार, अशा धातूंचा दीर्घकाळ त्वचेच्या संपर्कात येणारा वापर त्वचेचे गंभीर विकार, मूत्रपिंडाशी संबंधित आजार तसेच मज्जासंस्थेवर विपरीत परिणाम होण्याचा धोका वाढवू शकतो. त्यामुळे नागरिकांच्या आरोग्याच्या दृष्टीने खबरदारीचा उपाय म्हणून एफडीएने संबंधित उत्पादनांवर तातडीची कारवाई केली आहे. तपासादरम्यान संबंधित कंपन्यांनी सौंदर्य प्रसाधनांबाबत लागू असलेल्या नियमांचे उल्लंघन केल्याचेही समोर आले. अनेक उत्पादनांच्या पॅकिंगवर उत्पादक कंपनीचे नाव, पत्ता, बॅच क्रमांक, उत्पादनाची तारीख आणि कालबाह्यता तारीख यांसारखी आवश्यक माहिती नमूद करण्यात आलेली नव्हती, ही गंभीर बाब तपासात उघड झाली.
यापूर्वीही केंद्र सरकारने पाकिस्तानमधून आयात होणाऱ्या वस्तूंवर निर्बंध लागू असताना कथितरित्या ‘गोरी ब्युटी क्रिम’ची विक्री केल्याप्रकरणी मुंबईतील चेंबूर परिसरातील एका दुकानदाराविरुद्ध पोलिसांनी गुन्हा नोंदविला होता. त्या पार्श्वभूमीवर एफडीएने राज्यभरातील किरकोळ आणि घाऊक विक्रेते तसेच ई-कॉमर्स प्लॅटफॉर्मना संबंधित क्रिम्सची विक्री तात्काळ थांबविण्याचे आदेश दिले आहेत. बाजारात उपलब्ध असलेला सर्व शिल्लक साठा गोळा करून तो जवळच्या एफडीए कार्यालयात जमा करण्याच्या सूचनाही देण्यात आल्या आहेत. नागरिकांनी सौंदर्य प्रसाधने खरेदी करताना केवळ अधिकृत आणि विश्वासार्ह विक्रेत्यांकडूनच उत्पादने खरेदी करावीत, पॅकिंगवरील सर्व आवश्यक माहिती तपासावी आणि आरोग्याशी कोणतीही तडजोड करू नये, असे आवाहन एफडीएकडून करण्यात आले आहे. संशयास्पद किंवा नियमबाह्य सौंदर्य प्रसाधनांची माहिती आढळल्यास ती तातडीने संबंधित प्रशासनाला कळविण्याचे आवाहनही करण्यात आले आहे.
बंदी घालण्यात आलेल्या ३ ब्युटी क्रिम्सची नावे :
- गोरी ब्युटी क्रिम (Goree Beauty Cream): मूळची पाकिस्तानी बनावट असलेली ही क्रिम भारतात मोठ्या प्रमाणावर विकली जात होती.
- फेस फ्रेश गोल्ड ब्युटी क्रिम आणि ब्युटी सिरम (Face Fresh Gold Beauty Cream & Beauty Serum): या क्रिमला देखील आरोग्यासाठी घातक ठरवण्यात आले आहे.
- गोल्डन स्टार ब्युटी क्रिम (Golden Star Beauty Cream): या क्रिमच्या दर्जाबाबत गंभीर त्रुटी आढळल्या आहेत.
