पुणे : पुणेकरांना लंडनप्रमाणे डबल डेकर बसमधून प्रवासाचा अनुभव देण्याच्या उद्देशाने हाती घेण्यात आलेला पीएमपीचा इलेक्ट्रिक डबल डेकर बस प्रकल्प सध्या रखडल्याचे चित्र आहे. या प्रकल्पाला अद्याप अंतिम मंजुरी मिळालेली नसून पूर्वी निश्चित करण्यात आलेले मार्ग तांत्रिक अडचणींमुळे बदलण्याची शक्यता निर्माण झाली आहे. मेट्रोची सुरू असलेली कामे, रस्त्यांवरील झाडांच्या वाढलेल्या फांद्या, वीजवाहिन्या तसेच उड्डाणपुलांची उंची या कारणांमुळे डबल डेकर बसच्या वाहतुकीत अडथळे येण्याची शक्यता व्यक्त केली जात आहे. त्यामुळे पुणे महानगर परिवहन महामंडळाला (पीएमपी) नव्याने मार्गांचे सर्वेक्षण करण्याची वेळ आली आहे. जून २०२५ मध्ये पीएमपीने चार संभाव्य मार्गांवर सर्वेक्षण केले होते. त्यानंतर सप्टेंबर २०२५ मध्ये हिंजवडी, रामवाडी, कल्याणीनगर, पुणे रेल्वे स्थानक, लोहगाव विमानतळ आणि भोसरी या मार्गांचा विचार करण्यात आला होता. या प्रकल्पाअंतर्गत सुरुवातीला १० ते २५ इलेक्ट्रिक डबल डेकर बसेस सुरू करण्याचा प्रस्ताव होता. कात्रज डेपो ते हिंजवडी या मार्गावर यशस्वी चाचणीही घेण्यात आली होती. मात्र, अनेक मार्गांवर सुरू असलेली मेट्रोची कामे आणि डबल डेकर बसची सुमारे साडेचार मीटर उंची यामुळे व्यवहार्यतेचा प्रश्न निर्माण झाला आहे.
पीएमपीचे अध्यक्ष व व्यवस्थापकीय संचालक महेश आव्हाड यांनी प्रकल्प रद्द झालेला नसल्याचे स्पष्ट करत नव्या मार्गांचा अभ्यास सुरू असल्याची माहिती दिली. नव्या सर्वेक्षणामध्ये बसची उंची आणि मेट्रो पुलांमधील अंतर, रस्त्यांवरील झाडांच्या फांद्या, वीजवाहिन्यांचा अडथळा, सब-वे आणि उड्डाणपुलांखालील उपलब्ध जागा यांची सविस्तर तपासणी केली जाणार आहे. याशिवाय बसच्या बॅटरीची कार्यक्षमता, देखभाल खर्च आणि संभाव्य बिघाडांच्या शक्यतांचाही अभ्यास केला जाणार आहे. दरम्यान, पुण्यात दररोज सुमारे १२ लाख प्रवासी पीएमपीच्या १,७७० बसेसचा वापर करतात. ही संख्या शहराच्या गरजांच्या तुलनेत अपुरी असल्याचे मानले जाते. जूनअखेर ४५ नवीन बसेस, वर्षअखेरीस आणखी मोठ्या संख्येने बसेस आणि पुढील वर्षापर्यंत सुमारे पावणेतीन हजार बसेस ताफ्यात दाखल होण्याची अपेक्षा आहे. त्यामुळे अनेक पुणेकरांनी महागड्या डबल डेकर प्रकल्पापेक्षा नियमित बसेसची संख्या वाढवून सेवा गुणवत्ता सुधारण्यावर भर देण्याची मागणी केली आहे.
