वृत्तसंस्था : होर्मुझ सामुद्रधुनीजवळ अमेरिकेच्या एएच-६४ अपाचे हेलिकॉप्टरच्या दुर्घटनेनंतर अमेरिका आणि इराण यांच्यातील तणाव आणखी वाढला आहे. अमेरिकेचे राष्ट्राध्यक्ष डोनाल्ड ट्रम्प यांनी या घटनेसाठी इराणला जबाबदार धरत हेलिकॉप्टर पाडण्यात आल्याचा दावा केला आहे. अमेरिकन लष्कराच्या माहितीनुसार, हेलिकॉप्टरवरील दोन्ही वैमानिकांची सुरक्षित सुटका करण्यात आली असून ते सुखरूप आहेत. मात्र हेलिकॉप्टर कोसळण्यामागील नेमके कारण सुरुवातीला स्पष्ट झाले नव्हते आणि त्याबाबत चौकशी सुरू असल्याचेही सांगण्यात आले होते.
या घटनेनंतर अमेरिकेने इराणच्या काही लष्करी आणि संरक्षणाशी संबंधित ठिकाणांवर मर्यादित कारवाई केल्याचे वृत्त समोर आले आहे. इराणमधील काही भागांमध्ये स्फोट झाल्याच्या बातम्याही स्थानिक माध्यमांनी दिल्या आहेत. अमेरिकेने या कारवाईला आत्मसंरक्षणाचा भाग असल्याचे म्हटले आहे. दुसरीकडे, इराणने अमेरिकेचे सर्व आरोप फेटाळून लावत हेलिकॉप्टर प्रकरणातील आपली भूमिका नाकारली आहे. तसेच अमेरिकेच्या कारवाईला प्रदेशातील शांतता आणि स्थैर्यासाठी धोकादायक असल्याचे म्हटले आहे. दरम्यान, इराणकडूनही अमेरिकन हितसंबंधांवर प्रत्युत्तरात्मक कारवाया झाल्याचे दावे समोर येत आहेत. इराणचे परराष्ट्र मंत्रीअब्बास अराघची यांनी अमेरिकेला कठोर इशारा देत इराणच्या भूभागावर पुन्हा हल्ला झाल्यास योग्य प्रत्युत्तर दिले जाईल, असे स्पष्ट केले आहे. या वाढत्या संघर्षामुळे मध्यपूर्वेतील तणाव पुन्हा वाढला असून अमेरिका-इराण शांतता चर्चेलाही मोठा धक्का बसण्याची शक्यता तज्ज्ञांनी व्यक्त केली आहे. जागतिक स्तरावर या घडामोडींवर बारकाईने लक्ष ठेवले जात असून परिस्थिती आणखी चिघळण्याची भीती व्यक्त केली जात आहे.
