मुंबई : एकनाथ शिंदे यांच्या हस्ते ‘लाडकी बहीण’ या मराठी चित्रपटाचा टीझर दिमाखात लाँच करण्यात आला. या सोहळ्याला श्रीरंग बरने, संदीप शिरसागर तसेच गुलाबराव पाटील, योगेश कदम आणि उदय सामंत यांची उपस्थिती होती. यावेळी बोलताना शिंदे यांनी सांगितले की, हा चित्रपट केवळ मनोरंजनापुरता मर्यादित नसून महिलांसाठी राबविण्यात येणाऱ्या शासकीय योजनांचे वास्तव चित्रण करणारा आहे. ‘माझी लाडकी बहीण’ योजनेचा लाभ सामान्य महिलांपर्यंत कसा पोहोचतो, हे या चित्रपटातून प्रभावीपणे दाखवण्यात आले आहे. १५ मे रोजी प्रदर्शित होणारा हा सिनेमा कुटुंबासह पाहावा, असे आवाहन त्यांनी केले.
चित्रपटाचे दिग्दर्शन शीतल शिंदे यांनी केले असून शनिदेव फिल्म्स यांच्या बॅनरखाली निर्मिती झाली आहे. कथा, पटकथा आणि संवाद गणेश शिंदे यांचे आहेत, तर सहनिर्माते म्हणून शेखर मते आणि कार्यकारी निर्माते म्हणून बाबासाहेब पाटील यांनी जबाबदारी सांभाळली आहे. या चित्रपटात स्मिता तांबे मुख्य भूमिकेत दिसणार असून, तिच्यासोबत सुरेखा कुडची, उषा नाडकर्णी, गौतमी पाटील, माधव अभ्यंकर, शशांक शिंदे आणि संजय खापरे यांचा समावेश आहे. ग्रामीण आणि शहरी महिलांच्या आयुष्यातील बदल प्रभावीपणे मांडण्याचा प्रयत्न या चित्रपटातून करण्यात आला असून, महिला सक्षमीकरणाचा संदेश देणारा हा सिनेमा प्रेक्षकांमध्ये चर्चेचा विषय ठरत आहे.
