वृत्तसंस्था : मराठी कलाविश्वात सध्या लग्नसराई सुरू असल्याचं पाहायला मिळत आहे. अलीकडेच ‘बिग बॉस मराठी’ फेम सूरज चव्हाण, सोहम बांदेकर-पूजा बिरारी, ‘स्वराज्यरक्षक संभाजी’ फेम अभिनेत्री प्राजक्ता गायकवाड या लोकप्रिय कलाकारांचा विवाहसोहळा पार पडला. आता या पाठोपाठ मराठी मनोरंजनसृष्टीतील आणखी एका अभिनेत्याने चाहत्यांना आनंदाची बातमी दिली आहे. हास्यजत्रेतून घराघरांत पोहोचलेला हा अभिनेता नुकताच विवाहबंधनात अडकला आहे. या अभिनेत्याचं नाव आहे निमिष कुलकर्णी.
‘महाराष्ट्राची हास्यजत्रा’ या कार्यक्रमामुळे अनेक नवोदित कलाकार घराघरांत लोकप्रिय झाले. या शोचे चाहते केवळ महाराष्ट्रातच नव्हे तर जगभरात आहेत. निमिष कुलकर्णीला सुद्धा या कार्यक्रमामुळे सर्वत्र एक वेगळी ओळख मिळाली. काही महिन्यांपूर्वीच निमिषचा साखरपुडा पार पडला होता. आता अभिनेत्याने थाटामाटात लग्न केलं आहे. निमिषच्या पत्नीचं नाव कोमल आहे. अनेक मराठी मालिकांची क्रिएटिव्ह हेड म्हणून तिने जबाबदारी सांभाळली आहे. कोमल ‘लाखात एक आमचा दादा’ या मालिकेची क्रिएटिव्ह हेड होती.
