मुंबई : आमदार निवासातील कॅन्टीनमध्ये शिळे अन्न दिल्यामुळे शिवसेनेचे (शिंदे) आमदार संजय गायकवाड यांनी कॅन्टीनमधील कर्मचाऱ्याला मारहाण केल्याचा प्रकार नुकताच समोर आला आहे. या मारहाणीचे व्हिडीओ समाजमाध्यमांवर व्हायरल होत आहेत. अंगात बनियान (Vest) आणि कमरेला टॉवेल गुंडाळलेल्या अवस्थेत आमदार संजय गायकवाड त्यांच्या खोलीतून कॅन्टीनमध्ये आले आणि त्यांनी कॅन्टीनमधील कर्मचाऱ्याला खडे बोल सुनावत मारहाण केली. दरम्यान, यावर कॅन्टीनमधील कर्मचाऱ्यांनी देखील प्रतिक्रिया दिली आहे.
या कॅन्टीनमधील कर्मचाऱ्यांनी काही वेळापूर्वी टीव्ही ९ मराठीशी बातचीत केली. यावेळी त्यांनी सांगितलं की “रात्री १० वाजण्याच्या सुमारास हा राडा झाला. आमदाराने आमच्या एका सहकाऱ्याला मारलं. जेवणात काहीतरी खराब आहे असं म्हणत त्यांनी मारहाण केली. सर्वजण शांतपणे जेवत होते. मात्र, अचानक आमदार आले आणि सर्वांना म्हणाले, कोणी काही खाऊ नका. कोणी काही खाल्लं असेल तर त्याचे पैसे देऊ नका. ते मारहाण करत होते. मी दिव्यांग असल्यामुळे माझ्या सहकाऱ्याला वाचवायला पुढे गेलो नाही. आमचा एक सहकारी मध्ये पडला आणि त्याने मार खाणाऱ्याला वाचवलं.” दुसऱ्या एका कर्मचाऱ्याने सांगितलं की “मी काल ड्युटीवर नव्हतो. मात्र, आमच्या काही सहकाऱ्यांनी मला सांगितलं की “काल रात्री १० वाजता इथे मोठा राडा झाला. एका आमदाराने आमचा सहकारी योगेश शेट्टी याला मारहाण केली. त्याची प्रकृती सध्या बरी नाहीये. तो रुग्णालयात उपचार घेत आहे.”
