नवी मुंबई : पैसे गुंतवल्यापासून ३० दिवसांत दुप्पट रक्कम करण्याच्या हमीला बळी पडून पाच जणांनी ५२ लाखांची गुंतवणूक केली. मात्र अकरा ते आठ महिने उलटूनही पैसे न मिळाल्याने अखेर गुंतवणूकदारांनी उरण पोलीस ठाण्यात आरोपींच्या विरोधात दिलेल्या तक्रारीवरून तीन जणांवर गुन्हा दाखल करण्यात आला आहे.
अक्षय भोईर त्याची आई वनमाला भोईर आणि वडील शाम भोईर असे यातील आरोपींची नावे आहेत. त्या तिघांनी मिळून अनेकांना आमच्याकडे पैसे गुंतवल्यास ३० दिवसांत दुप्पट करून मिळतील असे आमिष दाखवले. या आमिषाला बळी पडून हरेश पयेर यांनी २० लाख, त्यांचा मित्र पंकज पाटील यांनी २ लाख ६५ हजार ऑनलाईन तर ३५ हजार रोकड असे एकूण ३ लाख, श्रीकांत गायकवाड यांनी रोख ९ लाख ६५ हजार, किरण जांभुळकर यांनी धनादेशद्वारे १ लाख ८० हजार तर रोख ६३ हजार रोख असे २ लाख ४३ हजार तसेच सतीश पाटील यांनी १४ लाख धनादेशद्वारे तर ३ लाख रोख असे १७ लाख रुपयांची गुतंवणूक केली. असे एकूण पाच जणांनी ५२ लाख ८ हजार रुपयांची गुंतवणूक जानेवारी २०२३ ते एप्रिल २०२३ दरम्यान भोईर यांच्याकडे केली. मात्र ३० दिवस झाले तरीही ठरल्याप्रमाणे दुप्पट रक्कम दिली नाही. याबाबत वारंवार विचारणा केल्यावर केवळ वायदे केले. शेवटी आपली फसवणूक होत असल्याचे लक्षात आल्यावर उरण पोलीस ठाण्यात तक्रार करण्यात आली. या तक्रारीची शहानिशा करून बुधवारी याबाबत अक्षय भोईर त्याची आई वनमाला भोईर आणि वडील शाम भोईर यांच्या विरोधात फसवणूक अफरातफर करणे कलमान्वये गुन्हा नोंद करण्यात आला आहे.
