पुणे : पुण्यासारख्या वेगाने विकसित होणाऱ्या शहरात रोजगार, शिक्षण आणि व्यवसायाच्या निमित्ताने परराज्य तसेच राज्यातील विविध जिल्ह्यांतून मोठ्या प्रमाणावर नागरिक स्थलांतरित होत आहेत. या पार्श्वभूमीवर शहरातील सुरक्षितता अधिक बळकट करण्यासाठी पुणे पोलिसांनी भाडेकरू आणि घरमालकांच्या पडताळणीची विशेष मोहीम सुरू केली आहे. या मोहिमेअंतर्गत प्रत्येक घरमालकाने आपल्या भाडेकरू किंवा पेईंग गेस्टची संपूर्ण माहिती संबंधित पोलिस ठाण्यात ऑनलाइन अथवा प्रत्यक्ष सादर करणे बंधनकारक करण्यात आले आहे. नियमांचे पालन न करणाऱ्या घरमालकांवर कायदेशीर कारवाई करण्यात येणार असल्याचा इशारा पोलिस प्रशासनाने दिला आहे. दरवर्षी हजारो विद्यार्थी, नोकरी करणारे युवक, व्यावसायिक आणि कामगार पुण्यात वास्तव्यास येतात. त्यापैकी अनेकजण भाड्याच्या घरात किंवा पेईंग गेस्ट म्हणून राहतात. मात्र, अनेक ठिकाणी भाडेकरार केला जात नाही किंवा भाडेकरूंची माहिती पोलिसांकडे नोंदवली जात नाही. अशा परिस्थितीत एखादी गुन्हेगारी घटना घडल्यानंतर संबंधित ठिकाणी नेमके कोण राहत होते, याचा तपास करणे कठीण होते. ही बाब लक्षात घेऊन पुणे पोलिसांनी ‘भाडेकरू/पेईंग गेस्ट माहिती विनंती’ या सुविधेद्वारे प्रत्येक घरमालकाने भाडेकरूंची माहिती पोलिसांकडे अनिवार्यपणे नोंदवावी, असे आवाहन केले आहे. ही मोहीम पोलिसांच्या विशेष शाखेच्या समन्वयातून शहरातील विविध पोलिस ठाण्यांच्या अधिकाऱ्यांच्या सहभागाने राबविण्यात येत आहे.
या विशेष मोहिमेअंतर्गत सर्वाधिक भाडेकरू असलेल्या परिसरांमध्ये पोलिसांकडून प्रत्यक्ष भेटी देऊन माहिती संकलित केली जात आहे. घरमालकांनी भाडेकरूंची माहिती पोलिसांकडे जमा केली आहे का, संबंधित व्यक्तींची ओळख आणि कागदपत्रांची पडताळणी करण्यात आली आहे का, याची तपासणी केली जात आहे. ज्या घरमालकांनी नियमांचे पालन केलेले नाही, त्यांच्याविरोधात कायदेशीर कारवाईची प्रक्रिया सुरू करण्यात येणार असल्याचे पोलिसांनी स्पष्ट केले आहे. विशेष मोहिमेदरम्यान २१ ते २८ जुलै २०२६ या कालावधीत तब्बल ७१ घरमालक आणि भाडेकरूंविरुद्ध कारवाईसाठी प्रस्ताव सादर करण्यात आले असून, ही प्रकरणे पुढील कार्यवाहीसाठी संबंधित पोलिस ठाण्यांकडे पाठविण्यात आली आहेत. या मोहिमेचा मुख्य उद्देश शहरातील सुरक्षितता वाढविणे, संशयित व्यक्तींवर प्रभावी नजर ठेवणे, गुन्हेगारीला प्रतिबंध करणे आणि नागरिकांच्या सुरक्षेला अधिक बळकटी देणे हा असल्याचे पोलिसांनी नमूद केले आहे. नागरिकांनीही घर किंवा सदनिका भाड्याने देताना भाडेकरूंची ओळखपत्रे, आवश्यक कागदपत्रे आणि पोलिस पडताळणीची प्रक्रिया पूर्ण करावी, असे आवाहन करण्यात आले आहे. भविष्यात कोणत्याही अनुचित घटनेची चौकशी सुलभ व्हावी आणि शहरात सुरक्षित वातावरण कायम राहावे, यासाठी प्रत्येक घरमालकाने या मोहिमेत सहकार्य करावे, असेही पुणे पोलिसांनी स्पष्ट केले आहे.
