ठाणे : ठाणे महानगरपालिकेच्या कै. मारोतराव शिंदे तरण तलाव येथे सराव करणाऱ्या तसेच ठाणे जिल्हा हौशी जलतरण संघटनेशी संलग्न असलेल्या स्टारफिश स्पोर्ट्स फाउंडेशनच्या युवा जलतरणपटूंनी स्वित्झर्लंडमधील झुरिच लेक येथे आयोजित ३८ व्या श्री चिन्मय स्विम मॅरेथॉन स्पर्धेत ऐतिहासिक कामगिरी करत भारतीय जलतरण क्षेत्राचा गौरव वाढवला आहे. २६ किलोमीटर अंतराच्या वेटसूट सांघिक प्रकारात भारतीय संघाने प्रथमच रजत पदक पटकावण्याचा मान मिळवला. या उल्लेखनीय यशानंतर आमदार निरंजन डावखरे आणि नगरसेवक राजेश मोरे यांच्या हस्ते या युवा जलतरणपटूंचा सत्कार करण्यात आला. भारतीय संघात कु. आयुषी कैलाश आखाडे (वय १५, डीएव्ही पब्लिक स्कूल, ठाणे), कु. समीप्ता गणेश वाव्हळ (वय १२, डीएव्ही पब्लिक स्कूल, ठाणे) आणि कु. सुयश प्रियंका हिंदळेकर (वय १४, श्रीरंग विद्यालय, ठाणे) यांचा समावेश होता. विशेष म्हणजे, या आंतरराष्ट्रीय स्पर्धेत सहभागी झालेल्या दहा संघांमध्ये भारतीय संघ हा वयाने सर्वात लहान संघ ठरला. अल्पवय असूनही या तिघांनी आपल्या धैर्य, कौशल्य आणि उत्कृष्ट सांघिक समन्वयाच्या जोरावर जागतिक स्तरावर भारताची छाप पाडली. या कामगिरीमुळे ठाणे शहरातील जलतरणपटूंसाठी प्रेरणादायी उदाहरण निर्माण झाले असून, आंतरराष्ट्रीय स्तरावर भारतीय युवा खेळाडूंच्या क्षमतेचा ठसा उमटला आहे.
या स्पर्धेत भारतीय संघाने तब्बल २६ किलोमीटरचे अंतर ८ तास ७ मिनिटांत पूर्ण करत रौप्यपदकावर नाव कोरले. स्पर्धेदरम्यान प्रचंड पाऊस, वेगवान थंड वारे आणि अत्यंत थंड पाण्याचा सामना करावा लागल्याने ही स्पर्धा अधिक आव्हानात्मक ठरली होती. प्रतिकूल हवामानातही न डगमगता भारतीय संघाने जिद्द, चिकाटी आणि सांघिक शिस्तीच्या बळावर स्पर्धा यशस्वीरीत्या पूर्ण केली. कठीण परिस्थितीत दाखविलेल्या या उल्लेखनीय कामगिरीमुळे भारतीय संघाला प्रथमच या स्पर्धेत रजत पदक मिळाले आणि भारतीय जलतरण इतिहासात एक नवा अध्याय लिहिला गेला. या यशामुळे ठाणे शहर, महाराष्ट्र आणि देशाच्या क्रीडा क्षेत्रात अभिमानाची भर पडली असून, सर्व स्तरांतून या युवा जलतरणपटूंवर अभिनंदनाचा वर्षाव होत आहे. प्रशिक्षक, पालक आणि स्टारफिश स्पोर्ट्स फाउंडेशनच्या मार्गदर्शनामुळे या खेळाडूंनी आंतरराष्ट्रीय स्तरावर उत्कृष्ट कामगिरी करत भारतीय तिरंगा उंचावला आहे. त्यांच्या या यशामुळे राज्यातील इतर युवा जलतरणपटूंनाही जागतिक स्पर्धांमध्ये चमकदार कामगिरी करण्याची प्रेरणा मिळणार असून, भविष्यात अशाच प्रकारे भारतासाठी अधिकाधिक पदके जिंकण्याचा विश्वास क्रीडाप्रेमींनी व्यक्त केला आहे.
