मुंबई : आता मोबाईल रिचार्ज करण्यासाठी वेगवेगळ्या ॲप्समध्ये फिरण्याची गरज उरलेली नाही, कारण WhatsApp ने भारतातील वापरकर्त्यांसाठी एक नवीन सुविधा सुरू केली आहे. या फीचरच्या मदतीने वापरकर्ते थेट ॲपमधूनच प्रीपेड मोबाईल रिचार्ज करू शकतात. Meta च्या या प्लॅटफॉर्मवर हे अपडेट टप्प्याटप्प्याने Android आणि iOS वापरकर्त्यांसाठी उपलब्ध करून दिले जात आहे. या सुविधेमुळे केवळ स्वतःचाच नाही तर मित्र आणि कुटुंबातील सदस्यांचाही मोबाईल क्रमांक सहजपणे रिचार्ज करता येतो, ज्यामुळे वेळ आणि मेहनत दोन्हीची बचत होते.
या फीचरचा वापर करणे अतिशय सोपे आहे. वापरकर्त्यांनी ॲपमधील ‘₹’ चिन्हावर टॅप करून ‘Mobile Prepaid Recharge’ पर्याय निवडायचा, संपर्क आणि प्लॅन निवडून पेमेंट पूर्ण करायचे असते. या माध्यमातून Reliance Jio, Bharti Airtel आणि Vodafone Idea यांसारख्या प्रमुख सेवा प्रदात्यांचे प्लॅन्स पाहता येतात. पेमेंटसाठी UPI, डेबिट आणि क्रेडिट कार्ड्सचे पर्याय उपलब्ध असून व्यवहार PayU द्वारे सुरक्षितपणे पूर्ण होतात. याशिवाय, या ‘₹’ आयकॉनद्वारे पैसे पाठवणे, बिल भरणे आणि मेट्रो तिकिटे बुक करणे अशा सुविधा देखील उपलब्ध आहेत. या नव्या सुविधेमुळे WhatsApp आता केवळ चॅटिंगपुरते मर्यादित न राहता एक ‘ऑल-इन-वन’ प्लॅटफॉर्म म्हणून विकसित होत असल्याचे स्पष्ट झाले आहे.
