मुंबई : बॉलिवूड अभिनेत्री नोरा फतेही हिने ‘सरके चुनार’ या वादग्रस्त गाण्याप्रकरणी राष्ट्रीय महिला आयोगासमोर हजर राहत अधिकृतपणे माफी मागितली आहे. या गाण्यात महिलांचे कथितपणे अश्लील आणि आक्षेपार्ह चित्रण करण्यात आल्याचा आरोप होत होता. त्यामुळे राष्ट्रीय महिला आयोगाने अभिनेत्रीला स्पष्टीकरणासाठी समन्स बजावले होते. आयोगातून बाहेर आल्यानंतर माध्यमांशी संवाद साधताना नोराने या प्रकरणाची नैतिक जबाबदारी स्वीकारत, “एक जबाबदार नागरिक म्हणून मी महिला आयोगाची माफी मागितली आहे. समाजाप्रती आपली जबाबदारी ओळखून मी ही भूमिका घेतली,” असे सांगितले. तसेच समाजासाठी सकारात्मक योगदान देण्याच्या उद्देशाने १०० अनाथ मुलींच्या शिक्षणाचा संपूर्ण खर्च उचलण्याचा निर्णय घेतल्याची घोषणाही तिने केली. या निर्णयामुळे सोशल मीडियावर विविध प्रतिक्रिया उमटत असून, काहींनी तिच्या भूमिकेचे स्वागत केले आहे.
केडी: द डेव्हिल या चित्रपटातील ‘सरके चुनार’ गाणे प्रदर्शित झाल्यानंतर सोशल मीडियावर मोठ्या प्रमाणात टीकेचा भडका उडाला होता. महिलांचे सादरीकरण आणि गाण्यातील काही दृश्यांवर आक्षेप घेत अनेक संघटनांनी कारवाईची मागणी केली होती. वाढत्या विरोधानंतर हे गाणे यूट्यूबवरून हटवण्यात आले. दरम्यान, नोराने याआधी सोशल मीडियावर व्हिडिओ शेअर करत आपण फक्त कन्नड आवृत्तीसाठी शूट केले होते आणि हिंदी आवृत्तीत गाण्याचा वापर कसा होईल याची कल्पना नव्हती, असे स्पष्ट केले होते. मात्र, आता तिने संपूर्ण प्रकरणाची जबाबदारी स्वीकारत माफी मागितली आहे. यापूर्वी संजय दत्त आणि बादशाह यांनीही राष्ट्रीय महिला आयोगासमोर हजर होत खेद व्यक्त केला होता. संजय दत्त यांनी ५० आदिवासी मुलींच्या शिक्षणाचा खर्च उचलण्याचे आश्वासन दिले होते. या संपूर्ण प्रकरणामुळे मनोरंजन क्षेत्रातील आशय, महिलांचे चित्रण आणि सामाजिक जबाबदारी या मुद्द्यांवर पुन्हा एकदा चर्चा रंगू लागली आहे.
