मुंबई : पदवीधर आणि शिक्षक मतदारसंघ निवडणुकीसाठी मतदारांना आपले नाव मतदारयादीत समाविष्ट करता यावे, तसेच या संपूर्ण प्रक्रियेसाठी वेळ वाढवून द्यावी अशी मागणी कौशल्य, रोजगार, उद्योजकता आणि नाविन्यता मंत्री मंगल प्रभात लोढा यांनी केली आहे, निवडणूक आयोगाच्या मुख्य निवडणूक अधिकाऱ्यांना लोढा यांनी पत्र पाठवून वरील मागणी केली आहे. राज्य निवडणूक आयोगाने महाराष्ट्र पदवीधर आणि शिक्षक मतदारसंघ निवडणुकीचे वेळापत्रक जाहीर केले आहे. त्याप्रमाणे ३० सप्टेंबर रोजी मतदार नोंदणीला सुरुवात झाली असून मतदारयादीत नाव समाविष्ट करण्यासाठी ६ नोव्हेंबरपर्यंत अर्ज सादर करता येणार आहेत. परंतु यासाठी मुदत वाढवून देण्याची मागणी लोढा यांनी केली आहे.
महाराष्ट्रातील सद्यस्थिती आणि सुरू असलेली उपोषणे या सर्व कारणांमुळे इच्छुक मतदारांना, त्यांच्या नाव नोंदणीमध्ये अडचणी येण्याची शक्यता आहे. जास्तीत जास्त मतदारांना नाव नोंदणी करता यावी याकरिता मतदार नाव नोंदणीसाठी देण्यात आलेल्या कालावधी वाढवावा, असे लोढा यांनी पत्रात नमुद केले आहे.
