मुंबई : राज्यात अन्न व औषध प्रशासन विभागाकडून (FDA) भेसळयुक्त आणि निकृष्ट अन्नपदार्थांविरोधात कारवाईचे सत्र सुरूच आहे. FDA आयुक्त तुकाराम मुंढे यांच्या निर्देशानुसार, अनियमितता आढळणाऱ्या आस्थापनांचे परवाने निलंबित करण्यासह कठोर कारवाई केली जात आहे. आगामी दिवाळी आणि इतर सणांच्या पार्श्वभूमीवर विभागाने ‘फेस्टिव्ह क्रॅकडाउन’ मोहीम राबवली आहे. नवरात्रोत्सवादरम्यान राज्यभरात केलेल्या कारवाईत ९.११ कोटी रुपयांचा निकृष्ट आणि भेसळयुक्त अन्नसाठा जप्त करण्यात आला आहे.
मिळालेल्या माहितीनुसार, छत्रपती संभाजीनगरमध्ये ४.१९ कोटी रुपयांचा अन्नसाठा जप्त करण्यात आला. याशिवाय, राज्यभरात ३.१५ कोटी रुपयांचा गुटखा, पानमसाला आणि तंबाखू जप्त करण्यात आला आहे. या कारवाईत 68 आस्थापनांचे परवाने निलंबित करण्यात आले असून, सात आस्थापने बंद करण्याचे निर्देश देण्यात आले आहेत. तसेच, २२ गुन्हे दाखल करण्यात आले असून, २० आरोपींना अटक करण्यात आली आहे. यावेळी ८३९२ किलो मुदतबाह्य, खराब आणि नाकारलेला अन्नसाठाही जप्त करण्यात आला. तुकाराम मुंढे यांच्या मार्गदर्शनाखाली मुंबई, कोकण, पुणे, नाशिक, छत्रपती संभाजीनगर आणि नागपूर या सहाही विभागांत ही मोहीम राबवण्यात आली. नष्ट करणे आवश्यक असलेले अन्नपदार्थ पुन्हा बाजारात आणून ग्राहकांच्या आरोग्याला धोका निर्माण करणाऱ्यांवर प्रशासनाने कारवाई केली आहे. दरम्यान, दिवाळीच्या काळात मिठाई, खवा, खाद्यतेल, सुकामेवा आणि फराळाच्या पदार्थांची मागणी वाढण्याची शक्यता आहे. त्यामुळे FDA कडून तपासणी आणि कारवाईची मोहीम अधिक तीव्र केली जाणार आहे. याच पार्श्वभूमीवर FDA च्या सोलापूर विभागातील झोन-२ ने माळशिरस येथे कारवाई केली. पुणे-पंढरपूर मार्गावर खवा वाहतूक करणाऱ्या MH २५ AJ ४०२३ क्रमांकाच्या वाहनावर छापा टाकून १३३७ किलो खवा जप्त करण्यात आला. हा खवा धाराशिव जिल्ह्यातील तीन उत्पादकांनी तयार केला होता. तो सातारा शहरातील घाऊक आणि किरकोळ विक्रेत्यांना विक्रीसाठी नेला जात होता. नियमांचे पालन न करता उघड्यावर वाहतूक होत असल्याचे आढळल्यानंतर तपासणी करण्यात आली. नाशवंत असल्याने जप्त केलेला खवा तपासणीनंतर खड्ड्यात टाकून नष्ट करण्यात आला.
