वृत्तसंस्था : हिंदू धर्मातील नववर्षाचा पहिला मोठा सण म्हणजे ‘मकर संक्रांत’. यंदा १४ जानेवारी २०२६ रोजी हा सण साजरा होत आहे. मात्र, यंदाची संक्रांत काहीशी वेगळी आहे. पंचांगानुसार, यंदा संक्रांती देवीने पिवळ्या रंगाचे वस्त्र परिधान केले आहे. शास्त्रानुसार, संक्रांती देवीने ज्या रंगाचे वस्त्र नेसलेले असते, तो रंग त्या दिवशी वर्ज्य मानला जातो. यामुळेच यंदा पिवळ्या रंगाचे कपडे किंवा साडी नेसू नये, असा सल्ला ज्योतिषांकडून दिला जात आहे. पण मग प्रश्न उरतो की, पिवळा रंग वर्ज्य असेल तर स्त्रियांच्या सौंदर्याचा अविभाज्य भाग असलेले ‘सोनं’ परिधान करता येईल का? आणि पूजेतील ‘हळद’ वापरावी का? तर याच उत्तर आम्ही देतो.
यंदा संक्रांती देवी घोड्यावर स्वार होऊन येत असून तिने पिवळ्या रंगाचे पितांबर नेसले आहे. शास्त्रानुसार, देवीने जो रंग धारण केला असतो, तो रंग त्या विशिष्ट दिवशी पृथ्वीवरील मानवांसाठी ‘पीडादायक’ किंवा ‘अशुभ’ मानला जातो. त्यामुळे केवळ पिवळी साडीच नाही, तर पिवळ्या बांगड्या, टिकली किंवा पर्स वापरणे टाळावे, असे सांगितले जाते. संक्रांतीला सुवासिनी एकमेकींना हळद-कुंकू लावतात. हळद ही पिवळी असली तरी ती मांगल्याचे प्रतीक आहे. पूजेमध्ये किंवा हळद-कुंकवाच्या विधीमध्ये हळदीचा वापर करण्यास शास्त्राने बंदी घातलेली नाही.
