मुंबई : राज्यातील ‘मुख्यमंत्री माझी लाडकी बहीण’ योजनेच्या लाभार्थी महिलांसाठी आनंदाची बातमी समोर आली आहे. मे महिन्याच्या हप्त्याच्या प्रतीक्षेत असलेल्या पात्र महिलांच्या बँक खात्यात १२ ते १५ जूनदरम्यान १,५०० रुपयांचा हप्ता जमा होण्याची शक्यता आहे. यासंदर्भातील माहिती भाजपच्या शेवगाव-पाथर्डी मतदारसंघाच्या आमदार मोनिका राजळे यांनी समाजमाध्यमांवरील पोस्टद्वारे दिली आहे. राज्यभरातील लाखो महिलांचे लक्ष मे महिन्याचा हप्ता कधी जमा होणार याकडे लागले असताना ही माहिती समोर आल्याने लाभार्थींमध्ये उत्सुकता वाढली आहे. सामाजिक न्याय विभागाने महिला व बालविकास विभागाला मे महिन्याचा हप्ता वितरित करण्यासाठी ३४४ कोटी रुपयांचा निधी मंजूर केला असून यासंदर्भातील शासन निर्णय १० जून रोजी जारी करण्यात आला आहे. त्यामुळे निधी उपलब्ध झाल्यानंतर हप्त्याचे वितरण लवकरच सुरू होणार असल्याचे संकेत मिळाले आहेत.
मोनिका राजळे यांनी केलेल्या पोस्टनुसार, पात्र लाभार्थी महिलांच्या खात्यात १२ ते १५ जून या कालावधीत हप्त्याची रक्कम जमा केली जाऊ शकते. मागील काही दिवसांपासून हप्ता जमा होण्यास झालेल्या विलंबामुळे अनेक महिलांनी चिंता व्यक्त केली होती. मात्र आता निधी मंजूर झाल्याने आणि संभाव्य तारखा जाहीर झाल्याने महिलांना मोठा दिलासा मिळण्याची शक्यता आहे. दरम्यान, शासनाने निश्चित केलेल्या निकषांनुसार पात्र ठरलेल्या महिलांनाच या योजनेचा लाभ मिळणार आहे. अपात्र लाभार्थी महिलांच्या खात्यात मे महिन्याचा हप्ता जमा होणार नसल्याचेही स्पष्ट करण्यात आले आहे. त्यामुळे लाभार्थी महिलांनी आपल्या बँक खात्याची माहिती अद्ययावत ठेवण्यासह शासनाकडून येणाऱ्या पुढील अधिकृत सूचनांकडे लक्ष ठेवावे, असे आवाहन करण्यात येत आहे. आता राज्यातील लाखो महिलांचे लक्ष हप्त्याची रक्कम प्रत्यक्ष खात्यात जमा होण्याकडे लागले असून, पुढील काही दिवसांत याबाबतची प्रक्रिया पूर्ण होण्याची अपेक्षा व्यक्त केली जात आहे.
