ठाणे : गणेशोत्सवाच्या पार्श्वभूमीवर ठाणे पोलिसांनी महत्त्वाचा प्रतिबंधात्मक आदेश जारी केला आहे. गणेशमूर्ती विसर्जनानंतर पाण्यावर तरंगणाऱ्या किंवा अर्धवट विरघळलेल्या मूर्तींचे फोटो काढणे, तसेच अशी छायाचित्रे प्रसिद्ध करणे किंवा सोशल मीडियावर प्रसारित करण्यास बंदी घालण्यात आली आहे. ठाणे शहर पोलीस आयुक्तालयाच्या विशेष शाखेचे पोलीस उपआयुक्त पराग मणेरे यांनी हा आदेश जारी केला असून तो १५ सप्टेंबर २०२६ ते ४ ऑक्टोबर २०२६ या कालावधीत संपूर्ण आयुक्तालयाच्या हद्दीत लागू राहणार आहे. यंदा १५, १६, १८, १९, २०, २१, २२, २५ सप्टेंबर, तसेच २६ सप्टेंबर (१३ दिवस) आणि ४ ऑक्टोबर (२१ दिवस) रोजी विविध गणेशमूर्तींचे विसर्जन होणार आहे. विसर्जनानंतर काही मूर्ती पूर्णपणे विरघळत नसल्याने त्या किनाऱ्यावर वाहून येतात किंवा पाण्यावर तरंगताना दिसतात. तसेच महानगरपालिकेचे कर्मचारी या मूर्ती गोळा करत असतानाची छायाचित्रेही काही जणांकडून काढली जातात. अशा छायाचित्रांमुळे धार्मिक भावना दुखावल्या जाण्याची, सामाजिक सलोखा बिघडण्याची आणि सार्वजनिक शांततेला बाधा येण्याची शक्यता लक्षात घेऊन पोलिसांनी हा निर्णय घेतला आहे.
पोलिसांनी स्पष्ट केले आहे की अशा प्रकारची छायाचित्रे वृत्तमाध्यमे, सोशल मीडिया किंवा इतर कोणत्याही सार्वजनिक माध्यमांवर प्रकाशित अथवा प्रसारित करू नयेत. गणेश विसर्जनानंतरची दृश्ये चुकीच्या पद्धतीने वापरली जाऊन समाजात गैरसमज किंवा तणाव निर्माण होऊ नये, यासाठी हा आदेश लागू करण्यात आला आहे. या आदेशाचे उल्लंघन करणाऱ्यांविरुद्ध भारतीय न्याय संहिता (बीएनएस), २०२३ मधील कलम २२३ अंतर्गत दंडात्मक कारवाई करण्यात येणार असल्याचा स्पष्ट इशारा पोलिसांनी दिला आहे. या आदेशाची माहिती सर्वसामान्य नागरिकांपर्यंत पोहोचावी यासाठी सार्वजनिक ठिकाणी सूचना फलक लावणे, स्थानिक वृत्तपत्रांमध्ये जाहिराती प्रसिद्ध करणे तसेच ठाणे पोलीस आयुक्तालयाच्या हद्दीत लाऊडस्पीकरद्वारे जनजागृती करण्याचे निर्देशही देण्यात आले आहेत. गणेशोत्सव शांततेत आणि धार्मिक भावना जपत पार पडावा, तसेच विसर्जनानंतरच्या दृश्यांचा कोणत्याही प्रकारे गैरवापर होऊ नये, यासाठी नागरिकांनी पोलिस प्रशासनाला सहकार्य करण्याचे आवाहन करण्यात आले आहे.
