मुंबई : विविध समस्या सोपडविण्यात आलेल्या अपयशाच्या निषेधार्थ राज्यातील ॲप आधारित कॅब, टॅक्सी आणि रिक्षा चालकांनी ९ ऑक्टोबर रोजी बंदची हाक दिली आहे. पंतप्रधान नरेंद्र मोदी यांचे लक्ष वेधण्यासाठी एक दिवसीय बंद पुकारण्याचे आवाहन भारतीय गिग कामगार मंचाने केले आहे. या बंदमुळे राज्यातील वाहतूक सेवेवर परिणाम होण्याची शक्यता आहे.
राज्य परिवहन विभागाच्या नियमांचे उल्लंघन करणाऱ्या ॲग्रीगेटर्सवर कठोर कारवाई करण्याची मागणी चालकांनी केली आहे. इंधन आणि देखभाल खर्चात प्रचंड वाढ झाली असून चालकांचे उत्पन्न कमी आहे. त्यामुळे सामाजिक सुरक्षा नाही आणि तक्रारींचे निराकरण करण्यासाठी योग्य व्यवस्था नाही. त्यामुळे ९ ऑक्टोबर रोजी चांगले वेतन, विमा लाभ, पारदर्शक भाडे संरचना आणि ॲप कंपन्यांकडून मनमानीपणे चालकांची खाती निलंबित करणे थांबवावे आदी मागण्या करण्यात येणार आहेत, असे भारतीय गिग कामगार मंचाद्वारे सांगण्यात आले.
