वृत्तसंस्था : मराठी चित्रपटसृष्टीतील लोकप्रिय दिग्दर्शक आणि अभिनेते प्रवीण तरडे सध्या त्यांच्या देऊळ बंद २ या चित्रपटामुळे चर्चेत आहेत. २१ मे रोजी प्रदर्शित झालेल्या या चित्रपटाने बॉक्स ऑफिसवर दमदार कामगिरी करत ३२ कोटी रुपयांच्या कमाईचा टप्पा पार केला आहे. स्वामीभक्ती आणि शेतकऱ्यांच्या जीवनावर आधारित असलेल्या या चित्रपटाला प्रेक्षकांचा उत्स्फूर्त प्रतिसाद मिळत आहे. चित्रपटाच्या यशानिमित्त प्रवीण तरडे आणि त्यांची पत्नी, अभिनेत्री स्नेहल तरडे विविध चित्रपटगृहांमध्ये जाऊन प्रेक्षकांशी संवाद साधत आहेत. तसेच माध्यमांना दिलेल्या मुलाखतींमधूनही ते चित्रपटाविषयी आणि आगामी योजनांविषयी माहिती देत आहेत. अशाच एका मुलाखतीत प्रवीण तरडे यांनी चाहत्यांसाठी मोठी घोषणा करत त्यांच्या पुढील प्रोजेक्टची माहिती दिली.
प्रवीण तरडे यांनी सांगितले की, मुळशी पॅटर्न २ हा त्यांचा पुढील महत्त्वाकांक्षी चित्रपट असणार आहे. २०१८ मध्ये प्रदर्शित झालेल्या मुळशी पॅटर्न या गाजलेल्या चित्रपटाच्या पुढील भागातून यावेळी घरांच्या वाढत्या किमतीमागील वास्तव समोर आणले जाणार आहे. “आपल्या घराचे स्वप्न इतके महाग का झाले, याचे उत्तर ‘मुळशी पॅटर्न २’मध्ये मिळेल,” असे त्यांनी सांगितले. ‘मुळशी पॅटर्न २ – तुमच्या घरातल्या भिंतीतील वाळूची गोष्ट’ या नावाने येणारा हा चित्रपट अत्यंत प्रभावी आणि वास्तववादी असल्याचा दावा त्यांनी केला आहे. लवकरच या चित्रपटाचे चित्रीकरण सुरू होणार असून चाहत्यांमध्ये त्याबाबत मोठी उत्सुकता निर्माण झाली आहे.
