मुंबई : राज्य परिवहन (एसटी) कर्मचाऱ्यांच्या प्रलंबित आर्थिक व प्रशासकीय मागण्या दिवाळीपूर्वी पूर्ण न झाल्यास ५ नोव्हेंबरपासून राज्यभरातील सर्व आगार आणि विभागीय कार्यालयांसमोर बेमुदत धरणे आंदोलन करण्यात येणार असल्याचा इशारा महाराष्ट्र स्टेट ट्रान्सपोर्ट कामगार संघटनेने दिला आहे. आंदोलनाची सुरुवात ३ नोव्हेंबरला घंटानाद आणि निदर्शनांनी, तर ४ नोव्हेंबरला द्वारसभा घेऊन करण्यात येणार आहे. २ नोव्हेंबरपर्यंत शासनाने सकारात्मक निर्णय घ्यावा, अशी संघटनेची मागणी आहे. दिवाळीपूर्वी कर्मचाऱ्यांना २५ हजार रुपयांची दिवाळी भेट आणि १२ हजार ५०० रुपयांची सण उचल देण्यात यावी, तसेच ऑक्टोबर महिन्याचे वेतन २ नोव्हेंबरला अदा करावे, अशी प्रमुख मागणी करण्यात आली आहे. याशिवाय २०१६ पासूनची वार्षिक वेतनवाढ व घरभाडे भत्त्याची थकबाकी, २०१८ पासूनचा महागाई भत्त्याचा फरक तातडीने देण्याबरोबरच जानेवारी २०२६ पासून महागाई भत्ता ५८ टक्क्यांवरून ६० टक्के करण्याची आणि राज्य सरकारी कर्मचाऱ्यांप्रमाणे वेतनश्रेणी लागू करण्याची मागणीही संघटनेने केली आहे.
आर्थिक मागण्यांबरोबरच विविध प्रशासकीय प्रश्नांवरही संघटनेने नाराजी व्यक्त केली आहे. महिला सन्मान आणि ज्येष्ठ नागरिकांसाठी वापरल्या जाणाऱ्या एनसीएमसी कार्डातील त्रुटी दूर करून आगारांमध्ये कार्ड टॉप-अपची सुविधा उपलब्ध करावी, यूपीआय व्यवहारांमुळे वाहकांना होणारा त्रास कमी करावा, तसेच एसटी कर्मचारी व त्यांच्या कुटुंबीयांसाठी कॅशलेस वैद्यकीय सुविधा लागू करावी, अशी मागणी करण्यात आली आहे. कंत्राटी भरती थांबवून महामंडळाच्या मालकीच्या जागांचा विकास स्वतः करावा, भाडेतत्त्वावरील ई-बस करार रद्द करून स्वमालकीच्या बस खरेदी कराव्यात, तसेच महिला कर्मचाऱ्यांच्या प्रसूती रजेसंदर्भातील परिपत्रक रद्द करावे, अशीही मागणी आहे. अधिकाऱ्यांकडील नियमभंगाकडे दुर्लक्ष होत असताना कर्मचाऱ्यांवर किरकोळ कारणांवर कठोर कारवाई केली जात असल्याचा आरोप संघटनेने केला असून, दिवाळीपूर्वी मागण्यांवर तोडगा न निघाल्यास आंदोलन अधिक तीव्र करण्याचा इशारा देण्यात आला आहे.
