वृत्तसंस्था : अभिनेता आदिनाथ कोठारे पहिल्यांदाच एका डिटेक्टिव्हची भूमिका साकारणार आहेत. ‘ डिटेक्टिव्ह धनंजय ‘ या आगामी मालिकेत ते मुख्य भूमिकेत दिसणार आहेत. ही मालिका झी५ मराठी ओरिजिनल्सवर लवकरच प्रेक्षकांच्या भेटीला येणार आहे. आदिनाथ या मालिकेत केवळ अभिनयच नाही, तर निर्मितीची धुराही सांभाळणार आहेत. प्रसिद्ध कादंबरीकार बाबूराव अर्नाळकर यांनी साकारलेले धनंजय हे पात्र आदिनाथ पडद्यावर जिवंत करणार आहेत. ही भूमिका साकारणे आव्हानात्मक असले तरी, एक अभिनेता आणि कथाकार म्हणून त्यांना नवीन अनुभव देणारे आहे, असे आदिनाथ यांनी सांगितले.
‘डिटेक्टिव्ह धनंजय’ हा माझ्यासाठी खूप खास प्रोजेक्ट आहे. मी पहिल्यांदाच एका डिटेक्टिव्हची भूमिका साकारत आहे आणि त्याच वेळी मी या मालिकेची निर्मितीही करत आहे. ही भूमिका साकारणे थोडे कठीण आहे, पण खूपच रंजक आहे. कारण ती मला एक अभिनेता आणि कथाकार म्हणून नवीन मार्गांनी आव्हान देते, असे आदिनाथ कोठारे यांनी सांगितले. आदिनाथ यांनी ‘पाणी’ या चित्रपटातून दिग्दर्शन क्षेत्रात पदार्पण केले. या चित्रपटाला पर्यावरण संवर्धन/जतन या विषयावरील सर्वोत्कृष्ट चित्रपटाचा राष्ट्रीय चित्रपट पुरस्कार मिळाला, तसेच अनेक पुरस्कार आणि नामांकनंही मिळाली.
