मुंबई : मुंबईतील अंधेरी-वर्सोवा परिसरात एक हृदयद्रावक आणि संतापजनक घटना उघडकीस आली आहे. चाचा नेहरू गार्डनजवळील लष्करिया बिल्डिंगच्या मागे रस्त्याच्या वॉलकंपाऊंडजवळ अंदाजे एक महिन्याच्या मुलीला कचऱ्यात टाकून दिल्याची धक्कादायक बाब समोर आली आहे. पालकांनी किंवा मुलाची देखभाल करणाऱ्या व्यक्तीने हेतुपुरस्सर परित्याग केल्याचा प्राथमिक अंदाज पोलिसांनी व्यक्त केला आहे.
ही घटना २ नोव्हेंबर रोजी सकाळी १०.१० ते ११.१० या दरम्यान घडली असून फिर्यादी डीपक सांडू चव्हाण यांनी तात्काळ पोलीस ठाण्यात तक्रार नोंदवली. निर्दोष, निष्पाप बालिकेला कचऱ्यात फेकून देण्याचा हा अमानुष प्रकार उघड होताच परिसरात संतापाची लाट उसळली आहे. समाज म्हणून आपण कुठे चाललो आहोत याचा प्रश्न हा प्रकार प्रत्येकाच्या मनाला पिळ लावणारा आहे. अशा क्रूर कृत्याला कठोरात कठोर शिक्षा व्हावी, अशी मागणी नागरिकांतर्फे होत आहे. पोलिसांकडून आरोपीचा शोध घेतला जात आहे.
