पुणे : पुणे शहराला पाणीपुरवठा करणाऱ्या खडकवासला धरण साखळी प्रकल्पातील पाणीसाठा झपाट्याने कमी होत असल्याने महापालिका प्रशासनाने पुढील तीन महिन्यांसाठी पाणी व्यवस्थापनाचे नियोजन सुरू केले आहे. सध्या धरणांमध्ये अवघा ५.५ टीएमसी पाणीसाठा उपलब्ध असल्यामुळे शहरात दिवसाआड पाणीपुरवठा करण्याचा पर्याय गंभीरपणे विचाराधीन आहे. यासंदर्भातील प्रस्ताव पाणीपुरवठा विभागाने महापालिका आयुक्तांकडे सादर केला असून पुढील दोन ते तीन दिवसांत यावर अंतिम निर्णय होण्याची शक्यता आहे.
प्रशासनाच्या अंदाजानुसार सध्याच्या प्रमाणात पाणीपुरवठा सुरू राहिल्यास उपलब्ध साठा जुलै अखेरपर्यंतच पुरू शकतो. त्यामुळे भविष्यातील संभाव्य पाणीटंचाई टाळण्यासाठी आतापासूनच उपाययोजना करण्याची गरज निर्माण झाली आहे. शहरातील लाखो नागरिकांशी संबंधित हा महत्त्वाचा विषय असल्याने अंतिम निर्णय घेण्यापूर्वी विविध राजकीय पक्षांच्या प्रतिनिधींशी चर्चा केली जाणार असल्याचे प्रशासनाकडून सांगण्यात आले आहे. पुणे शहराच्या मासिक पाणीगरजेचा विचार करता दरमहा सुमारे १.६० टीएमसी पाणी आवश्यक असते. त्यानुसार पुढील तीन महिन्यांसाठी ४.८० टीएमसी पाण्याची गरज भासणार आहे. याशिवाय या कालावधीत सुमारे १.८० टीएमसी पाणी बाष्पीभवनामुळे कमी होण्याचा अंदाज असून शेतीसाठी सुरू असलेल्या आवर्तनासाठी आणखी ०.८० टीएमसी पाण्याची आवश्यकता आहे. त्यामुळे प्रत्यक्षात धरणांमध्ये किमान ६.६० टीएमसी पाणीसाठा असणे अपेक्षित आहे. मात्र उपलब्ध साठा त्यापेक्षा कमी असल्याने प्रशासनाला पाणी कपातीचा पर्याय विचारात घ्यावा लागत आहे. दरम्यान, जून महिन्याचा पहिला आठवडा संपत आला तरी शहरात पूर्वमोसमी पावसाने हजेरी लावलेली नाही. तसेच मान्सूनलाही सुमारे दोन आठवड्यांचा विलंब होण्याची शक्यता हवामान तज्ज्ञांनी व्यक्त केली आहे. या पार्श्वभूमीवर नागरिकांनी पाण्याचा काटकसरीने वापर करावा आणि पाणी बचतीला प्राधान्य द्यावे, असे आवाहन प्रशासनाकडून करण्यात येत आहे. योग्य नियोजन आणि पाणी वापरावर नियंत्रण ठेवल्यास संभाव्य टंचाईचा सामना करणे अधिक सोपे होईल, असा विश्वास महापालिका प्रशासनाने व्यक्त केला आहे.
