वृत्तसंस्था : बॉलिवूड अभिनेता Ajay Devgn याच्या बहुप्रतीक्षित दृश्यम ३ बाबत मोठी माहिती समोर आली आहे. मोहनलाल यांच्या मल्याळम आवृत्तीच्या चर्चेनंतर आता हिंदी ‘दृश्यम 3’ची उत्सुकता शिगेला पोहोचली आहे. चित्रपटाचे शूटिंग जवळपास पूर्ण झाले असून सध्या पोस्ट-प्रॉडक्शनचे काम सुरू आहे. ‘दृश्यम’ मालिकेतील विजय साळगावकर हे पात्र प्रेक्षकांच्या विशेष पसंतीस उतरले आहे. “२ ऑक्टोबरला काय झालं होतं?” हा संवाद आजही चाहत्यांच्या स्मरणात आहे. पहिल्या दोन भागांमध्ये विजयने आपल्या बुद्धिमत्ता, संयम आणि कुटुंबासाठी कोणत्याही थराला जाण्याच्या वृत्तीमुळे प्रेक्षकांची मने जिंकली होती. आता तिसऱ्या भागात कथा पुन्हा एका नव्या वळणावर येणार असून जुन्या रहस्यांबरोबरच अनेक नवीन प्रश्न आणि अनपेक्षित ट्विस्ट पाहायला मिळणार असल्याचे संकेत मिळत आहेत. त्यामुळे चाहत्यांमध्ये या चित्रपटाविषयी प्रचंड उत्सुकता निर्माण झाली आहे.
निर्माते कुमार मंगत पाठक आणि अभिषेक पाठक यांनी दिलेल्या माहितीनुसार, हिंदी ‘दृश्यम 3’ ही मल्याळम आवृत्तीची थेट नक्कल नसणार आहे. हिंदी प्रेक्षकांसाठी स्वतंत्र कथा आणि वेगळ्या मांडणीवर भर देण्यात आला आहे. मल्याळम चित्रपट अधिक कौटुंबिक नाट्यावर आधारित होता, तर हिंदी आवृत्तीला कौटुंबिक थ्रिलरचे स्वरूप देण्यात आले आहे. ट्रेलर प्रदर्शित झाल्यानंतर दोन्ही आवृत्त्यांमधील फरक स्पष्टपणे जाणवेल, असे निर्मात्यांनी सांगितले आहे. ‘दृश्यम’ फ्रँचायझीची कथा विजय साळगावकर आणि त्याच्या कुटुंबाभोवती फिरते, जे एका रहस्यमय घटनेनंतर संकटात सापडतात. तिसऱ्या भागात ही कथा कोणत्या दिशेने जाणार याकडे सर्वांचे लक्ष लागले आहे. पॅनोरमा स्टुडिओ आणि स्टार स्टुडिओ यांच्या बॅनरखाली तयार होत असलेला हा चित्रपट २ ऑक्टोबर २०२६ रोजी प्रदर्शित होणार असून, पुन्हा एकदा विजय साळगावकर प्रेक्षकांना रहस्य आणि थराराच्या नव्या प्रवासावर घेऊन जाणार आहे.
