मुंबई : जन्मजात हृदयविकाराने ग्रस्त असलेल्या वंचित बालकांना नवे आयुष्य देण्याच्या उद्देशाने राबविण्यात आलेल्या ‘गिफ्ट ऑफ लाईफ’ मोहिमेअंतर्गत ८५० हून अधिक मुलांवर मोफत हृदयशस्त्रक्रिया यशस्वीपणे करण्यात आल्या आहेत. या निमित्ताने जुहू येथील रोटरी सेवा केंद्रात आयोजित विशेष कार्यक्रमात ज्येष्ठ क्रिकेटपटू सुनील गावस्कर यांनी उपस्थित राहून शस्त्रक्रिया झालेल्या मुलांशी आणि त्यांच्या पालकांशी संवाद साधला. ‘रोटरी क्लब ऑफ बॉम्बे एअरपोर्ट’ आणि श्री सत्य साई संजीवनी बाल हृदय काळजी केंद्र यांच्या संयुक्त विद्यमाने हा उपक्रम राबविण्यात आला. यावेळी बोलताना गावस्कर म्हणाले की, या मुलांचा संघर्ष आणि त्यांच्यासाठी डॉक्टर व स्वयंसेवकांनी केलेले निस्वार्थ कार्य अत्यंत प्रेरणादायी आहे. योग्य वेळी मिळालेली मदत आणि दातृत्व यामुळे शेकडो मुलांचे प्राण वाचू शकतात, हे पाहून मन भरून येते. त्यांच्या मते, ही मुलेच खरे हिरो आहेत. गेल्या सहा वर्षांत या उपक्रमासाठी सुमारे १२ कोटी रुपयांचा निधी उभारण्यात आला असून शेकडो मुलांना अत्यावश्यक वैद्यकीय उपचार मिळाले आहेत.
‘गिफ्ट ऑफ लाईफ’ प्रकल्पाचे अध्यक्ष नितीन मेहता यांनी सांगितले की, प्रत्येक मुलाला निरोगी आयुष्याचा अधिकार आहे आणि आर्थिक अडचणींमुळे कोणतेही मूल उपचारांपासून वंचित राहू नये, यासाठी संस्था सातत्याने प्रयत्न करत आहे. शस्त्रक्रियेनंतर मुलांच्या चेहऱ्यावर उमटणारे हास्य हेच सर्वात मोठे समाधान असल्याचे त्यांनी नमूद केले. बालहृदयविकार शस्त्रक्रिया विभागाच्या प्रमुख डॉ. प्रभाता रश्मी यांनी सांगितले की, भारतात दरवर्षी दोन लाखांहून अधिक मुले जन्मजात हृदयविकारासह जन्माला येतात. त्यापैकी सुमारे ७० हजार मुलांना पहिल्याच वर्षात शस्त्रक्रियेची आवश्यकता असते; मात्र गरिबी आणि उशिरा निदानामुळे अनेकांना वेळेवर उपचार मिळत नाहीत. या मोहिमेला जर्मनीतील रोटरी क्लब ऑफ बर्लिन इंटरनॅशनल, मध्ये रोटरी क्लब ऑफ फोर्ट वेन तसेच विविध रोटरी क्लब आणि रोटरी इंटरनॅशनल च्या वर्ल्ड फंडचे सहकार्य लाभले आहे. शेकडो कुटुंबांच्या आयुष्यात आशेचा किरण निर्माण करणारी ही मोहीम समाजसेवेचे प्रेरणादायी उदाहरण ठरत आहे.
