पुणे : पुणेकरांसाठी अत्यंत आनंदाची बातमी आहे. लोहगाव विमानतळावर जाण्यासाठी आता पुणेकरांना ट्रॅफिकमध्ये अडकण्याची गरज भासणार नाही. वनाझ-रामवाडी मेट्रो मार्गिका आता थेट विमानतळापर्यंत नेण्याचा निर्णय घेण्यात आला असून, यासाठी कल्याणीनगरमार्गे जाणाऱ्या मार्गावर शिक्कामोर्तब करण्यात आलं आहे.
केंद्रीय हवाई वाहतूक राज्यमंत्री मुरलीधर मोहोळ यांनी घेतलेल्या बैठकीत ‘महामेट्रो’ने सादर केलेल्या सहा पर्यायांपैकी कल्याणीनगर स्पर लाईनला हिरवा कंदील दाखवण्यात आला. हा मार्ग कल्याणीनगर स्थानकाच्या पुढून सिम्बायोसिस कॉलेजमार्गे थेट विमानतळाजवळील एरोमॉलपर्यंत जाईल. या मार्गासाठी जमिनीचे अधिग्रहण कमीत कमी करावे लागणार आहे. हा मार्ग मुख्यत्वे रस्त्यावरून जाणार असल्याने संरक्षण मंत्रालयाच्या हद्दीतील जागेचा प्रश्न उद्भवणार नाही, त्यामुळे परवानगी मिळणे सोपे होईल. प्रवाशांना रामवाडी किंवा इतर ठिकाणाहून रिक्षा-टॅक्सी करण्याची गरज उरणार नाही, मेट्रो थेट विमानतळाच्या दारात उतरेल.
