ठाणे : ठाणे महापालिका निवडणुकीत मतदानाचा हक्क बजावण्यासाठी मतदारांना घरबसल्या मतदार यादीतील नाव आणि मतदान केंद्र शोधता यावे, यासाठी ‘मताधिकार’ मोबाईल ॲप सुरू करण्यात आला आहे. राज्य निवडणूक आयोगाने हा ॲप तयार केलेला असून त्याद्वारे मतदारांना आपल्या नावानुसार किंवा मतदार ओळखपत्र क्रमांक (इपीक) नुसार मतदान केंद्र आणि बुथची माहिती तात्काळ उपलब्ध होणार आहे.
ठाणे महापालिकेची निवडणुकीसाठी १५ जानेवारील मतदान होणार आहे. ठाणे महापालिका क्षेत्रात १६ लाख ४९ हजार ८६९ इतके मतदार आहेत. त्यामध्ये ८ लाख ६३ हजार ८७८ पुरुष, ७ लाख ८५ हजार ८३० महिला आणि १५९ इतर मतदार आहेत. या निवडणुकीसाठी ९ प्रभागांमध्ये ११ निवडणूक निर्णय अधिकाऱ्यांची कार्यालये आहेत. या निवडणुकीकरीता ३३ प्रभागांमध्ये एकूण २०१३ मतदान केंद्र स्थापन करण्यात आलेली आहेत. मतदान केंद्रांवर सर्व आवश्यक सुविधा तसेच मदतीसाठी स्वयंसेवक, दिव्यांगासाठी व्हीलचेअर, ज्येष्ठ नागरिकांसाठी बसण्याची सोय, पिण्याच्या पाण्याची सुविधा उपलब्ध करून देण्यात येणार आहे, असे पालिका प्रशासनाकडून सांगण्यात आले. ठाणे महापालिका निवडणुकीचा प्रचार मंगळवारी सायंकाळी संपला. या प्रचारानंतर आता मतदारांनी आपली नावे मतदार यादीत तसेच मतदान केंद्र शोधण्यास सुरूवात केली असून काही उमेदवारांकडून मतदारांना मतदार पावत्यांचे वाटप करण्यात येत आहे. असे असले तरी, मतदानाचा हक्क बजावण्यासाठी मतदारांना घरबसल्या मतदार यादीतील नाव आणि मतदान केंद्र शोधता यावे, यासाठी राज्य निवडणूक आयोगाने ‘मताधिकार’ मोबाईल ॲप सुरू करण्यात आला आहे.
