पुणे : पुणे येथून एक दुर्दैवी घटना समोर आली आहे. स्पर्धा परीक्षांची तयारी करणाऱ्या एका तरुणाने आत्महत्या केल्याचे समोर आले आहे. ही घटना विश्रामबाग पोलीस स्टेशनच्या हद्दीत घडली आहे. पोलिसांना सुसाईड नोट सापडली नसून महाराष्ट्र लोकसेवा आयोगाच्या (MPSC) परीक्षेत आलेल्या अपयशामुळे आत्महत्या केल्याची चर्चा आहे.
आत्महत्या केलेल्या तरुणाचे नाव सागर पवार (२६ वर्षीय) असे आहे. सागर हा मूळचा बुलढाणा येथील रहिवासी आहे. तो पुण्यात राहून MPSC परीक्षेची तयारी करत होता. त्याने आपल्या खोलीत गळफास घेत आपले जीवन संपवले. ही घटना शुक्रवार (२८ नोव्हेंबर) सकाळी अंदाजे ८ वाजता उघडकीस आली. आत्महत्या करण्यापूर्वी त्याने आपल्या खोलीचा दरवाजा आतून बंद करून घेतला होता. त्यामुळे, पोलिसांना घटनास्थळी दरवाजा तोडून आत प्रवेश करावा लागला. तेव्हा त्यांना सागर गळफास घेतलेल्या अवस्थेत सापडला. पोलिसांना घटनास्थळी कोणतीही सुसाईड नोट आढळली नाही. त्यामुळे, त्याच्या आत्महत्येचे नेमके कारण अद्याप स्पष्ट झालेले नाही. पोलिसांनी दिलेल्या माहितीनुसार, या तरुणाने MPSC परीक्षेतील अपयश पचवता न आल्याने हे टोकाचे पाऊल उचलले असावे, असा प्राथमिक संशय व्यक्त करण्यात येत आहे. विश्रामबाग पोलीस या प्रकरणाचा सखोल तपास करत असून, तरुणाच्या आत्महत्येमागील नेमक्या कारणांचा शोध घेत आहेत.
