पुणे : विद्यार्थ्यांची अवैध आणि धोकादायक पद्धतीने वाहतूक करणाऱ्या बस, इको व्हॅन, रिक्षाचालकांवर पिंपरी-चिंचवड पोलीस आणि प्रादेशिक परिवहन कार्यालयाने कारवाईचा दंडुका उगारला. विशेष मोहिमेंतर्गत शहरातील ३२७ वाहनांची तपासणी करून धोकादायक पद्धतीने वाहतूक करणाऱ्या २०५ बस, रिक्षाचालकांवर दंडात्मक कारवाई केली. त्यांच्याकडून सात लाख ६९ हजार ७५० रुपये दंड वसूल करण्यात आला.
पिंपरी-चिंचवड शहरात शालेय विद्यार्थ्यांची ने-आण करणाऱ्या बस, व्हॅन, रिक्षा धोकादायक पद्धतीने वाहतूक करत असल्याचे पोलिसांच्या निदर्शनास आले. काही बसचालक नियमांचे आणि शालेय विद्यार्थ्यांच्या सुरक्षेच्या दृष्टीने असलेल्या सूचनांचे पालन करत नाहीत. काही वेळा वाहनांच्या क्षमतेपेक्षा जास्त विद्यार्थ्यांना बसविले जातात. धोकादायक पद्धतीने विद्यार्थ्यांच्या होणाऱ्या वाहतुकीबाबत पिंपरी-चिंचवड पोलीस आणि प्रादेशिक परिवहन विभागाकडे नागरिकांनी तक्रारी केल्या होत्या. ‘नागरिकांच्या तक्रारींनंतर वाहतूक आणि प्रादेशिक परिवहन विभागाच्या चार वायुवेग पथकांमार्फत तपासणी करण्यात आली. पिंपरी, भोसरी, चाकण, वाकड, निगडी आणि हिंजवडी वाहतूक विभागाच्या हद्दींमध्ये कारवाई करण्यात आली. एकूण १७० बस आणि १५७ व्हॅन आणि रिक्षांची तपासणी करण्यात आली. त्यापैकी शालेय विद्यार्थ्यांची अवैध आणि धोकादायक पद्धतीने ने-आण करणाऱ्या ७० बस आणि १२८ व्हॅन, रिक्षांवर कारवाई करण्यात आली. चालकांकडून सात लाख ६९ हजार ७५० रुपये दंड वसूल केला गेला,’ असे वाहतूक विभागाचे पोलीस उपायुक्त विवेक पाटील यांनी सांगितले.
