डोंबिवली – मुंबई, ठाण्यासह डोंबिवली परिसरातील गुंतवणूकदारांना चार टक्के परतावा देण्याचे आमिष दाखवून डोंबिवली पश्चिमेतील नवापाडा अशोकनगरमध्ये राहत असलेल्या एका भामट्याने सेवानिवृत्त उपप्रादेशिक परिवहन अधिकाऱ्यासह इतर गुंतवणूकदारांची ६१ लाख ३६ हजार रूपयांची फसवणूक केली आहे. फसवणुकीचा आकडा कोटीच्या घरात असण्याची शक्यता वर्तवली जात आहे. फसवणूक केल्यानंतर हा भामटा आपले जयहिंद कॉलनीमधील गोपी मॉलमधील कार्यालय बंद करून पळाला आहे. त्याच्या घराला कुलूप असल्याने गुंतवणूकदार हवालदिल आहेत. सुदाम महादू गिते असे फसवणूक करणाऱ्या गुंतवणूक सल्लागाराचे नाव आहे. तो डोंबिवली पश्चिमेतील नवापाडा भागातील अशोकनगर मधील सोनुकाटे इमारतीत राहतो. गिते एन्टरप्रायझेस नावाने त्याने जयहिंद कॉलनीतील गोपी सिनेमा माॅलमध्ये कार्यालय सुरू केले होते. रुपकुमार मारोतराव बेलसरे (६०) असे फसवणूक झालेल्या आरटीओ अधिकाऱ्याचे नाव आहे. ते मुंबईत कुर्ला भागात कुटुंबीयांसह राहतात. ते मुंबई उच्च न्यायालयात वकिली करत आहेत.
आरटीओ अधिकारी रुपकुमार बेलसरे यांनी पोलीस ठाण्यातील तक्रारीत म्हटले आहे, आपण स्वत २०२२ मध्ये परिवहन विभागातून सेवानिवृत्त झालो. २०११ मध्ये आपले एक सहकारी सुरेंद्र अन्नमवार निवृत्त झाले. ते ठाणे येथे राहतात. अन्नमवार यांनी गिते यांना सांगितले की डोंबिवलीत सुदाम महादू गिते हे गुंतवणूक सल्लागार आहेत. ते आपल्या गुंतवणुकीवर चार टक्के परतावा देतात. आपण स्वता ४९ लाख रूपयांची गुंतवणूक केली आहे. त्यावर आकर्षक परतावा मिळतो. ही गुंतवणूक योजना चांगली वाटल्याने बेलसरे यांनीही आपल्या निवृत्तीनंतर मिळालेली एकूण ४० लाखाची रक्कम गिंते यांच्या आयसीआयसीआय बँकेत धनाव्दारे सप्टेंबर २०२२ मध्ये जमा केली. ठरल्याप्रमाणे या रकमेवर गिते यांनी ४० हजार रूपयांचा परतावा बेलसरे यांच्या बँक खात्यात जमा केला. बेलसरे यांनी आणखी दहा लाख रूपये पत्नी वर्ष आणि स्वताच्या नावे गिते यांच्याकडे गुंतविले.
या रकमेवरील परताव्याची वेळ आली तेव्हा गिते यांनी आता शेअर मार्केट खाली गेले आहे. त्यामुळे परतावा देण्यात अडचणी आहेत. शेअर मार्केट वर गेले की तुमचा शिल्लक १० लाखाचा परतावा तुम्हाला योग्यवेळी देऊ असे सांगितले. पहिल्या परताव्यानंतर बेलसरे यांना दुसरा परतावा मिळाला नाही. याबाबत बेलसरे यांनी भामटा गिते याला विचारणा केल्यावर आयसीआयसीआय बँक आपणास चांगली सेवा देत नाही म्हणून आपल्या १५० गुंतवणूकदारांची बँक खाती आपण ॲक्सिस बँकेत वळती करत आहोत. त्यामुळे परतावा देण्यास विलंब होत आहे. अनेक महिने अशी टाळाटाळ सुरू होती. बेलसरे, अन्नमवार यांनी आयसीआयसीआय बँकेत चौकशी केली तेव्हा त्यांना गिते यांनी गुंतवणूकदारांचे कोट्यवधी रूपये काढले असल्याचे समजले. एप्रिल २०२४ पासून गिते यांनी गुंतवणूकदारांना परतावा न देता गोपी माॅलमधील कार्यालय बंद आणि घराला कुलुप लावून पळ काढला आहे. दररोज अनेक गुंतवणूकदार गोपी माॅलमधील कार्यालयाकडे फेऱ्या मारत आहेत. आपली व अन्नमावर यांची ६१ लाखाची आर्थिक फसवणूक केल्याने विष्णुनगर पोलीस ठाण्यात तक्रार करण्यात आली आहे.
