कुर्ला लाल बहादूर शास्त्री मार्गावर झालेल्या मोठ्या अपघातात बेस्ट उपक्रमाच्या बसनं अनेक पादचाऱ्यांना चिरडलं. कुर्ला लाल बहादूर शास्त्री मार्गावरच्या मार्केटमध्ये भरधाव वेगानं शिरलेल्या बेस्ट बसनं अनेकांना धडक दिली. या अपघातात २० पेक्षा जास्त जण गंभीर जखमी झाल्याची माहिती मिळाली आहे. तर पाच जणांचा मृत्यू झाल्याची माहिती मिळत आहे. बेस्ट बस चालकाला ताब्यात घेण्यात आलं आहे. तसेच, पोलिसांनी त्याच्यावर सदोष मनुष्यवधाचा गुन्हा दाखल केला आहे.
आता या अपघाताचं सीसीटीव्ही फुटेज समोर आलं आहे. या अपघातानंतर घटनास्थळी मोठी गर्दी उसळली होती. त्यावेळी परिस्थितीवर नियंत्रण ठेवण्यासाठी पोलीस घटनास्थळी दाखल झालेले. ३३२ नंबरची बस कुर्ला कडून अंधेरीकडे जात असताना हा अपघात घडल्याची माहिती मिळाली आहे.
कुर्ला येथील बेस्ट बस अपघातात आतापर्यंत मृतांचा आकडा ५ झाला आहे. तर जखमी २० पेक्षा जास्त जणांवर विविध रुग्णालयात उपचार सुरू आहेत. विजय विष्णू गायकवाड(७०), आफ्रीन अब्दुल सलीम शहा(१९), अनम शेख(२०), कणीस फातिमा गुलाम कादरी(५५), शिवम कश्यप(१८) अशी मृतांची नावं आहेत. ज्यावेळी हा अपघात घडला, त्यावेळी अपघातग्रस्त बसमध्ये तब्बल ६० प्रवासी असल्याचं पोलिसांनी सांगितलं.
कुर्ला येथील बस अपघात प्रकरणी चालक संजय मोरे (५४) या बस चालकाला पोलिसांनी अटक केली आहे. बस चालकावर सदोष मनुष्यवधाचा गुन्हा दाखल करण्यात आला आहे. या अपघातात गस्तीवर असलेले चार पोलीस आणि एमएसएफ जवान ही जखमी झाले आहेत. अपघातात जखमी झालेल्या अधिकाऱ्याच्या फिर्यादीवर पोलिसांनी गुन्हा दाखल केला असून या प्रकरणी पुढील कारवाई सुरू असल्याची माहिती मिळत आहे.
