नवी मुंबई : नवी मुंबई आंतरराष्ट्रीय विमानतळाला लोकनेते स्व. दि. बा. पाटील यांचे नाव देण्याच्या मागणीसाठी पनवेल येथे करण्यात आलेल्या आंदोलनानंतर पनवेल शहर पोलिसांनी प्रमुख आंदोलकांसह २०० ते ३०० जणांविरुद्ध गुन्हा दाखल केला आहे. या कारवाईमुळे विमानतळ नामांतरणाच्या मुद्द्यावर सुरू असलेल्या आंदोलनाला नवे वळण मिळाले असून पुढील काळात हा वाद आणखी तीव्र होण्याची शक्यता व्यक्त केली जात आहे. पोलिसांनी दिलेल्या माहितीनुसार, ८ जुलै रोजी सकाळी सुमारे ११ वाजण्याच्या सुमारास छत्रपती शिवाजी महाराज चौक, पनवेल येथे रश्मिता राम पोपेटा, कांतीलाल कडु, आदित्य पोपेटा, अवंतिका पोपेटा आणि त्यांच्या समर्थकांनी आवश्यक परवानगी न घेता आंदोलन सुरू केले. या आंदोलनात सुमारे २०० ते ३०० पुरुष आणि महिलांचा सहभाग असल्याचे पोलिसांनी नमूद केले आहे. आंदोलनादरम्यान चौकात मोठ्या प्रमाणावर वाहतुकीची कोंडी निर्माण झाली असून त्यामुळे सर्वसामान्य नागरिकांना मोठा मनस्ताप सहन करावा लागल्याचा दावा पोलिसांनी केला आहे. परिस्थिती नियंत्रणात आणण्यासाठी पोलिसांनी आंदोलकांना संबंधित जमाव बेकायदेशीर असल्याची माहिती देत आंदोलन थांबवून तेथून निघून जाण्याचे आवाहन केले. मात्र, पोलिसांच्या सूचनांनंतरही आंदोलकांनी रस्त्यावर ठिय्या आंदोलन सुरूच ठेवल्याचा उल्लेख पोलिसांनी दाखल केलेल्या फिर्यादीत करण्यात आला आहे.
पोलिसांच्या फिर्यादीनुसार, आंदोलनादरम्यान काही आंदोलकांनी उपस्थित पोलीस अधिकारी आणि कर्मचाऱ्यांशी धक्काबुक्की केली, शिवीगाळ केली तसेच शासकीय कामात अडथळा निर्माण केल्याचा आरोप करण्यात आला आहे. या आरोपांच्या आधारे पनवेल शहर पोलीस ठाण्यात संबंधित प्रमुख आंदोलकांसह २०० ते ३०० जणांविरुद्ध विविध कलमांनुसार गुन्हा नोंदविण्यात आला आहे. या प्रकरणाचा पुढील तपास पोलीस उपनिरीक्षक राहुल डोळस करत आहेत. दरम्यान, नवी मुंबई आंतरराष्ट्रीय विमानतळाला लोकनेते स्व. दि. बा. पाटील यांचे नाव देण्याच्या मागणीसाठी विविध संघटना आणि स्थानिक नागरिकांकडून सातत्याने आंदोलन केले जात आहे. या पार्श्वभूमीवर पोलिसांनी केलेल्या कारवाईमुळे या आंदोलनाला आणखी वेग येण्याची शक्यता व्यक्त केली जात आहे. या प्रकरणात पोलिसांनी फिर्यादीतील आरोप नोंदवून तपास सुरू केला असून, तपासाच्या निष्कर्षांनुसार पुढील कायदेशीर कारवाई करण्यात येणार आहे. दुसरीकडे, आंदोलकांची भूमिका आणि त्यांची बाजूही पुढील प्रक्रियेदरम्यान स्पष्ट होण्याची अपेक्षा व्यक्त केली जात आहे.
