मुंबई : मंत्रालयाच्या पाचव्या आणि सहाव्या मजल्याच्या खिडकीतून दिसणारा दक्षिण मुंबईचा प्रशस्त नजारा पाहताना कोणताही अडथळा येऊ नये, म्हणून मंत्रालयाशेजारी बांधण्यात येत असलेल्या नव्या इमारतीचा पाचवा मजला बारगळण्याची चिन्हे आहेत. या इमारत चार मजल्यांचीच बांधण्याबाबत गांभीर्याने विचार सुरू असल्याचे समजते.
मंत्रालयातील जागेच्या अडचणींमुळे मंत्री कार्यालयांना सध्या सोयीची जागा उपलब्ध नाही. याशिवाय जागा कमी पडत असल्याने मंत्र्यांची गैरसोय होत आहे. त्यामुळे राज्य सरकारने मंत्रालयाच्या मुख्य इमारतीला लागून नवीन इमारत उभारण्याचा निर्णय घेतला होता. सुरुवातीला सात मजली इमारत बांधण्याचे नियोजन होते. मात्र, हेरिटेज समितीचा आक्षेप आणि सर्वोच्च न्यायालयाने मंत्रालय परिसरातील इमारतींना घालून दिलेली २४ मीटर उंचीची मर्यादा यामुळे नवी इमारत पाच मजली बांधण्याचा निर्णय झाला. मंत्रालयाच्या सहाव्या मजल्यावर मुख्यमंत्री आणि अन्य मंत्र्यांची दलाने आहेत. याशिवाय सचिवांचीही कार्यालये आहेत. येथून समुद्रकिनारा दिसतो. नव्या इमारतीचा पाचवा मजला बांधला की, समुद्रकिनाऱ्याचा ‘नजारा’ मंत्रालयातून दिसणार नाही. त्यामुळे नवी इमारत पाचऐवजी चारच मजल्यांची बांधावी, असे सरकारच्या विचाराधीन आहे. त्या दृष्टीने गंभीर चर्चाही सुरू आहे. मात्र, यावर अंतिम निर्णय झाला नसल्याने तूर्त चार मजल्यांपर्यंत बांधकाम करण्याचे नियोजन केले जात असल्याचेही समजते.
