मुंबई : एल्फिन्स्टन पूल वाहतुकीसाठी नुकताच बंद करण्यात आला असून सध्या त्याचे पाडकाम सुरू आहे. दरम्यान, या पुलाअभावी होणारी गैरसोय टाळण्यासाठी नागरिकांना अन्य पर्यायी मार्गांचा वापर करण्याचे आवाहन वाहतूक पोलीस व मुंबई महानगर प्रदेश विकास प्राधिकरणाकडून (एमएमआरडीए) करण्यात येत आहे. त्याबाबत शीव – भायखळा दरम्यानच्या भागातील रस्त्यांवर सूचना फलक लावण्यात आले आहेत. मात्र, संबंधित फलक इंग्रजी भाषेत लावण्यात आल्याने वाहतूक पोलीस आणि एमएमआरडीएला मराठीचा विसर पडला आहे का असा सवाल उपस्थित करण्यात येत आहे. त्याबाबत मराठी भाषकांकडून नाराजी व्यक्त केली जात असून मराठी एकीकरण समितीनेही याबाबत आक्षेप घेतला आहे.
वरळी-शिवडी उन्नत रस्ता प्रकल्पाअंतर्गत प्रभादेवी येथील जुना पूल पाडून त्याजागी नवीन द्विस्तरीय पूल बांधण्यात येणार आहे. त्यासाठी प्रभादेवी पूल बंद करून त्याचे पाडकाम सुरू करण्यात आले आहे. दरम्यान, हा पूल बंद झाल्याने मुंबईकरांना अन्य मार्गांचा वापर करावा लागत असून आसपासच्या परिसरात वाहतूक कोंडी होत आहे. लालबाग, चिंचपोकळी पूल, आयटीसी हॉटेल व करी रोड पूल परिसरात निर्माण होणाऱ्या वाहतूक कोंडीमुळे मुंबईकरांचा प्रवास त्रासदायक होऊ लागला आहे. दरम्यान, प्रवाशांची गैरसोय टाळण्यासाठी शीव – भायखळा दरम्यानच्या भागातील रस्त्यांवर वाहतूक पोलीस व एमएमआरडीएने प्रभादेवी, वरळी या भागात जाण्यासाठी चिंचपोकळी पूल, एस पूल, तसेच सेवा रस्त्यांचा वापर करण्याबाबत सूचना फलक लावले आहेत. मात्र, संबंधित फलक इंग्रजी भाषेत असून वाहतूक पोलीस व एमएमआरडीए प्रशासनाला मराठी भाषेचा विसर पडल्याचे आरोप मराठी भाषकांकडून केला जात आहे. मराठी एकीकरण समितीने याबाबत आक्षेप घेतला असून तेथे मराठी भाषेत फलक लावण्याची मागणी समितीने केली आहे.
