डोंबिवलीत बोगस कंपनी स्थापन करून गुंतवणूकदारांची १० कोटींची फसवणूक

पोलिसांनी सांगितले, महेश आत्माराम भोईर आणि इतर संचालकांनी बोगस गुंतवणूक कंपन्या स्थापन केल्या. सिनर्जी इन्व्हेस्टमेंट या गुंतवणूक कंपनीचे कार्यालय डोंबिवली शहरातील फडके रस्त्यावरील कृष्णा या उच्चभ्रूंच्या सोसायटीत अनिल आय रुग्णालयाच्या वरील मजल्यावर सुरू केले. या कंपन्यांनी गुंतवणुकीवर १४ ते १८ टक्के परतावा देण्याचे आमिष गुंतवणूकदारांना दाखविले. या आकर्षक परताव्याला भुलून, या कंपन्यांचे चकाचक कार्पोरेट कार्यालय पाहून गुंतवणूकदार या कंपन्यांकडे आकृष्ट झाले. डोंबिवलीसह ठाणे, रायगड जिल्ह्यातील ५० हून अधिक गुंतवणूकदारांनी या गुंतवणूक कंपनीत लाखो रूपयांच्या रकमा गुंतवणूक केल्या. या गुंतवणूक योजनेत रायगड मधील माणगाव येथे राहणारे शेतकरी शबरीप्रसाद आचार्य यांनीही ५१ लाख ८० हजार रूपयांची गुंतवणूक केली. ठराविक महिन्यानंतर गुंतवणूकदार कंपन्यांनी ग्राहकांना आकर्षक परतावा देणे गरजेचे होते. तो त्यांनी दिला नाही.

विविध कारणे सांगून आकर्षक परतावा देण्यास टाळाटाळ सुरू केली. आकर्षक परतावा मिळत नसल्याने काही गुंतवणूकदारांनी मूळ रक्कम परत करण्याची मागणी महेश भोईरसह इतर संचालक यांच्याकडे सुरू केली. ग्राहकांच्या संपर्काला संचालकांनी प्रतिसाद देण्यास टाळाटाळ, उडवाउडवीची उत्तरे देण्यास सुरूवात केली. नंतर त्यांनी आपले मोबाईल बंद करून ग्राहकांशी संपर्क तोडला. नऊ वर्ष गुंतवणूक करून त्याच्यावर परतावा नाहीच, मूळ रक्कम परत मिळत नसल्याने सिनर्जी इनव्हेस्टमेंट कंपनीसह त्यांच्या इतर गुंतवणूकदार कंपन्या आणि त्यांचे संचालक आपली फसवणूक करत आहेत. त्यांनी आपल्या रकमेचा स्वार्थासाठी वापर करून आपली फसवणूक केली याची खात्री पटल्यावर शबरीप्रसाद आणि इतर गुंतवणूकदारांनी ठाणे आर्थिक गुन्हे विभागाकडे तक्रार केली. आर्थिक गुन्हे विभागाचे पथक या प्रकरणाचा तपास करत आहे.