पुणे : जनगणना २०२७ च्या कामांमध्ये शिक्षकांचा सहभाग असल्यामुळे पुढे ढकलण्यात आलेल्या शिक्षक प्रशिक्षणाचे सुधारित वेळापत्रक राज्य शैक्षणिक संशोधन व प्रशिक्षण परिषद (एससीईआरटी) यांनी जाहीर केले आहे. राष्ट्रीय शिक्षण धोरण २०२० अंतर्गत नवीन अभ्यासक्रमाची अंमलबजावणी सुरू असल्याने इयत्ता दुसरी, तिसरी, चौथी आणि सहावीच्या शिक्षकांसाठी हे प्रशिक्षण आयोजित करण्यात आले आहे. एससीईआरटीच्या सहसंचालक डॉ. कमलादेवी आवटे यांनी प्रशिक्षणासंदर्भातील सविस्तर परिपत्रक प्रसिद्ध केले असून १० जुलैपर्यंत तालुकास्तरावरील सर्व प्रशिक्षण पूर्ण करण्याचे नियोजन करण्यात आले आहे. यापूर्वी दुसरी, तिसरी आणि चौथीच्या शिक्षकांचे राज्यस्तरीय प्रशिक्षण पूर्ण झाले असून सहावीच्या शिक्षकांचे प्रशिक्षण अद्याप बाकी आहे. त्यासाठी १७ व १८ जून रोजी पूर्वतयारी कार्यशाळा आयोजित करण्यात येणार असून २२ ते २५ जूनदरम्यान चार दिवसांचे राज्यस्तरीय प्रशिक्षण होईल. त्यानंतर २९ जून ते २ जुलै या कालावधीत जिल्हास्तरीय आणि ४ ते १० जुलैदरम्यान तालुकास्तरीय प्रशिक्षण आयोजित करण्यात येणार आहे.
इयत्ता दुसरीच्या शिक्षकांसाठी तीन दिवसांचे जिल्हास्तरीय प्रशिक्षण १८ ते ३० जून, तर तालुकास्तरीय प्रशिक्षण २२ जून ते २ जुलैदरम्यान होणार आहे. तिसरी आणि चौथीच्या शिक्षकांसाठी १८ ते ३० जून या कालावधीत चार दिवसांचे जिल्हास्तरीय प्रशिक्षण आणि २४ जून ते ४ जुलैदरम्यान तालुकास्तरीय प्रशिक्षण आयोजित करण्यात आले आहे. प्रशिक्षणाची जबाबदारी जिल्हा शिक्षण व प्रशिक्षण संस्था (डायट) यांच्याकडे सोपविण्यात आली असून प्रत्येकी ६० शिक्षकांच्या गटानुसार प्रशिक्षणार्थींच्या तुकड्या तयार केल्या जाणार आहेत. आवश्यकतेनुसार एकापेक्षा अधिक टप्प्यांत प्रशिक्षण पूर्ण करण्याच्या सूचना देण्यात आल्या आहेत. सहावीच्या राज्यस्तरीय प्रशिक्षक प्रशिक्षणासाठी मराठी माध्यमातील २४४ आणि उर्दू माध्यमातील २४० प्रशिक्षकांची आवश्यकता असून त्यांचा तपशील १५ जूनपर्यंत सादर करावा लागणार आहे. तसेच विशेष शिक्षक, साधन व्यक्ती, अनुभवी शिक्षक, व्याख्याते, पर्यवेक्षकीय अधिकारी आणि अभ्यासक्रम निर्मितीत सहभागी तज्ज्ञांचा प्रशिक्षण प्रक्रियेत समावेश करण्याच्या सूचनाही देण्यात आल्या आहेत.
