मुंबई : इराण-अमेरिका संघर्षाच्या पार्श्वभूमीवर इंधन दरवाढीचा फटका सर्वसामान्य नागरिकांना बसत असून मुंबईत CNG आणि PNGच्या दरात पुन्हा वाढ करण्यात आली आहे. महानगर गॅस लिमिटेडने (MGL) CNGच्या दरात प्रतिकिलो २ रुपयांची वाढ जाहीर केली असून घरगुती PNGच्या दरात प्रति SCM ५० पैशांची वाढ केली आहे. हे नवे दर मध्यरात्रीपासून लागू झाले आहेत. दरवाढीनंतर मुंबई, ठाणे, नवी मुंबई आणि मुंबई महानगर प्रदेशात CNGचा दर ८६ रुपये प्रतिकिलो झाला असून PNGचा दर ५२ रुपये प्रति SCM इतका झाला आहे. गेल्या दोन आठवड्यांतील ही दुसरी दरवाढ असल्याने नागरिक, वाहनचालक आणि गृहिणींच्या खर्चात आणखी वाढ होणार आहे.
यापूर्वी १३ मे रोजीही CNGच्या दरात २ रुपयांची वाढ करण्यात आली होती. त्यामुळे अवघ्या १५ दिवसांत CNG चार रुपयांनी महागला आहे. या सलग दरवाढीचा सर्वाधिक परिणाम रिक्षा आणि टॅक्सी चालकांवर होण्याची शक्यता व्यक्त केली जात आहे. आधीच्या दरवाढीनंतरच रिक्षा-टॅक्सी संघटनांनी प्रतिकिलोमीटर १ रुपया भाडेवाढ करण्याची मागणी केली होती. आता पुन्हा इंधन महागल्यामुळे भाडेवाढीचा मुद्दा अधिक तीव्र होण्याची शक्यता आहे. पेट्रोल आणि डिझेलच्या दरातही मागील काही दिवसांत अनेकदा वाढ झाल्याने महागाईचा भडका उडाला असून सर्वसामान्यांचे आर्थिक गणित विस्कळीत होत आहे. इंधन दरवाढीमुळे वाहतूक खर्च वाढण्याची शक्यता असून त्याचा परिणाम विविध वस्तूंच्या किमतींवरही होऊ शकतो.
