मुंबई : केंद्र सरकारने घरगुती एलपीजी गॅसच्या साठेबाजी आणि काळाबाजाराला आळा घालण्यासाठी नवीन ‘लॉकिंग पिरियड’ नियम लागू केले आहेत. या नियमानुसार शहरातील ग्राहकांना एका घरगुती सिलिंडरच्या बुकिंगनंतर पुढील सिलिंडर बुक करण्यासाठी किमान २५ दिवस प्रतीक्षा करावी लागणार आहे. ग्रामीण आणि दुर्गम भागातील ग्राहकांसाठी हा कालावधी ४५ दिवसांचा ठेवण्यात आला आहे. त्यामुळे अनेक ग्राहकांना गॅस लवकर संपल्यास काय करावे, असा प्रश्न पडत आहे. मात्र, सरकारने आणि गॅस कंपन्यांनी अशा परिस्थितीत काही पर्यायी सुविधा उपलब्ध करून दिल्या आहेत.
जर तुमचा गॅस २५ दिवसांच्या आत संपला, तर सर्वप्रथम तुम्ही ५ किलोचा ‘छोटू सिलिंडर’ खरेदी करू शकता. हा सिलिंडर जवळच्या गॅस एजन्सी किंवा काही निवडक पेट्रोल पंपांवर ओळखपत्र दाखवून सहज उपलब्ध होतो. दुसरा पर्याय म्हणजे डबल सिलिंडर कनेक्शन (DBC). सध्या तुमच्याकडे एकच सिलिंडर असल्यास गॅस एजन्सीकडे जाऊन दुसऱ्या सिलिंडरसाठी अर्ज करता येईल. त्यामुळे एक सिलिंडर संपल्यानंतर दुसरा त्वरित वापरणे शक्य होईल. तिसरा पर्याय म्हणजे तात्पुरत्या स्वरूपात कमर्शियल सिलिंडरचा वापर. कारण २५ दिवसांचा लॉकिंग पिरियड नियम फक्त घरगुती सिलिंडरवर लागू आहे. व्यावसायिक किंवा कमर्शियल सिलिंडरवर अशी कोणतीही मर्यादा नसल्याने अतिरिक्त गरज असल्यास ग्राहक छोट्या कमर्शियल सिलिंडरचा वापर करू शकतात.
