वृत्तसंस्था : दिग्दर्शक आणि अभिनेता प्रवीण तरडे यांच्या आगामी बहुचर्चित चित्रपट देऊळबंद २ चा अधिकृत ट्रेलर अखेर प्रदर्शित करण्यात आला असून, सोशल मीडियावर त्याला प्रेक्षकांचा जोरदार प्रतिसाद मिळत आहे. गुरुवारी दुपारी १ वाजता ट्रेलर रिलीज करण्यात आला आणि काही तासांतच चाहत्यांनी त्यावर लाईक्स आणि कमेंट्सचा अक्षरशः वर्षाव केला. प्रवीण तरडे यांच्या अधिकृत इंस्टाग्राम हँडलवर हा ट्रेलर पाहण्यासाठी उपलब्ध करण्यात आला असून, अवघ्या दोन तासांत जवळपास १८ हजारांहून अधिक लाईक्स मिळाल्याची माहिती समोर आली आहे. विशेष म्हणजे, ट्रेलरखाली स्वामीभक्तांनी “श्री स्वामी समर्थ”च्या जयघोषासह भावनिक प्रतिक्रिया नोंदवल्या आहेत. या चित्रपटात पुन्हा एकदा स्वामींची भूमिका मनोहर जोशी यांनी साकारली असून, ‘नास्तिक आणि स्वामी’ या संकल्पनेवर आधारित भक्ती आणि श्रद्धेचा संघर्ष मोठ्या पडद्यावर अनुभवायला मिळणार आहे.
प्रदर्शित ट्रेलरमध्ये एका नास्तिक महिलेची कथा दाखवण्यात आली आहे, जी तिच्या आस्तिक नवऱ्यासोबत सततच्या वादांमुळे त्रस्त झालेली असते. एका प्रसंगात तिचा नवरा रागाच्या भरात स्वामींचे देऊळ बंद करून निघून जातो. त्यानंतर ती महिला संतापाच्या भरात वटवृक्षाखाली जाऊन स्वामींना आव्हान देते आणि त्याच वेळी स्वामी तिच्यासमोर प्रकट होतात. ट्रेलरमधील स्वामी आणि त्या महिलेतील संवाद विशेष लक्षवेधी ठरत आहेत. “प्रत्येक युगात मी तुझ्यासारखे कित्येक रावण आणि दुर्योधन पाहिले,” असा स्वामींचा संवाद तर “तुम्ही कधी शेतकरी पाहिलाय का?” असा महिलेचा सवाल प्रेक्षकांचे लक्ष वेधून घेत आहे. ट्रेलरच्या शेवटी “परीक्षा घेतली आहेस ना, आता उत्तर दिल्याशिवाय मी जाणार नाही,” हा संवाद चित्रपटातील गूढ आणि आध्यात्मिक संघर्ष अधिक गडद करतो. चित्रपटात महेश मांजरेकर, ओम भुतकर आणि मंगेश देसाई यांच्याही महत्त्वपूर्ण भूमिका आहेत. तसेच ट्रेलरमध्ये श्रीकृष्णाचे दर्शन घडत असल्याने चित्रपटाबद्दलची उत्सुकता आणखी वाढली आहे.
