मुंबई : मुंबईतील कमला नेहरू पार्क येथे असलेली ‘म्हातारीचा बूट’ ही ऐतिहासिक आणि लोकप्रिय वास्तू पुन्हा नव्या रूपात झळकणार आहे. अनेक पिढ्यांच्या बालपणाच्या आठवणींशी जोडलेल्या या बुटाच्या आकाराच्या अनोख्या रचनेच्या दुरुस्ती आणि जीर्णोद्धारासाठी मुंबई महानगरपालिका प्रशासनाने सुमारे ७.२९ लाख रुपयांचा खर्च मंजूर केला आहे. हँगिंग गार्डनसमोरील ही वास्तू तिच्या वेगळ्या आकारामुळे, चिमणीसारख्या छतामुळे आणि आकर्षक रचनेमुळे पर्यटकांचे कायमच लक्ष वेधून घेत असते. ‘There Was an Old Woman Who Lived in a Shoe’ या प्रसिद्ध इंग्रजी बालगीतावर आधारित या वास्तूची निर्मिती महापालिकेचे माजी पर्यावरण अधिकारी आणि ‘नीरी’चे माजी अभियंता सोली आर्चीवाला यांनी केली होती.
१९५२ मध्ये सर्वसामान्यांसाठी खुली करण्यात आलेली ही वास्तू आजही मुंबईच्या ओळखीचा महत्त्वाचा भाग मानली जाते. काळाच्या ओघात संरचनेवर गंज, क्षार आणि झीज दिसून येत असल्याने आता तिच्या संवर्धनासाठी विशेष मोहीम राबवली जाणार आहे. महापालिकेने या दुरुस्ती प्रकल्पासाठी अभियांत्रिकी संस्थांकडून निविदा मागवल्या असून, कामामध्ये संपूर्ण संरचनेचे मजबुतीकरण आणि सौंदर्यवर्धन केले जाणार आहे. सुरुवातीला जुने फ्लोअरिंग, ग्लेज्ड टाईल्स आणि खराब झालेली स्टीलवर्क काढून टाकले जाईल. तसेच काँक्रीटमधील खराब झालेले भाग दुरुस्त करून रिइन्फोर्समेंट बारपर्यंत स्वच्छता केली जाणार आहे. पृष्ठभागावरील धूळ, तेल आणि अशुद्धी हटवल्यानंतर गंजरोधक प्रायमर आणि विशेष अँटी-कोरोसिव्ह पेंटचा वापर केला जाणार आहे. याशिवाय ग्रिल्स, मॉडिफाइड सिमेंट आणि कोटा स्टोनच्या माध्यमातून वास्तूला अधिक आकर्षक स्वरूप दिले जाईल. सजावटीचे प्रवेशद्वार आणि नैसर्गिक दगडांना पॉलिश करण्याचाही या योजनेत समावेश आहे. हे सर्व काम महापालिकेच्या जल अभियांत्रिकी विभागामार्फत करण्यात येणार असून, संपूर्ण प्रकल्प ४५ दिवसांत पूर्ण करण्याचे उद्दिष्ट ठेवण्यात आले आहे. यापूर्वी २०१८ मध्ये कमला नेहरू पार्कच्या पुनर्विकासादरम्यान ‘म्हातारीचा बूट’ या रचनेला नव्या रंगसंगतीसह नूतनीकरण करण्यात आले होते. आता पुन्हा एकदा या ऐतिहासिक वास्तूला नवसंजीवनी मिळणार असल्याने मुंबईकरांमध्ये उत्सुकता निर्माण झाली आहे.
