पुणे : सावित्रीबाई फुले पुणे विद्यापीठाच्या ७७व्या वर्धापन दिनानिमित्त जीवनसाधना गौरव पुरस्कार जाहीर करण्यात आले. दिवंगत उपमुख्यमंत्री अजित पवार यांना सामाजिक आणि राजकीय क्षेत्रामधील योगदानासाठी पुरस्कार जाहीर करण्यात आला आहे.
विद्यापीठाने प्रसिद्धिपत्रकाद्वारे ही माहिती दिली. विद्यापीठाचा वर्धापन दिन कार्यक्रम मंगळवारी (१० फेब्रुवारी) सकाळी साडेदहा १०.३० वाजता इरावती कर्वे सामाजिक शास्त्र संकुलातील स्वराज्यरक्षक धर्मवीर छत्रपती संभाजी महाराज सभागृहात आयोजित करण्यात आला आहे. ज्येष्ठ शास्त्रज्ञ डॉ. रघुनाथ माशेलकर यांच्या हस्ते विविध क्षेत्रातील मान्यवरांना पुरस्कार प्रदान करण्यात येणार आहेत. विद्यापीठाचे कुलगुरू डॉ. सुरेश गोसावी, प्र कुलगुरू डॉ. पराग काळकर या वेळी उपस्थित राहणार आहेत. विद्यापीठाच्या वर्धापन दिनानिमित्त दरवर्षी विविध क्षेत्रात उल्लेखनीय योगदान दिलेल्या व्यक्तींना जीवनसाधना गौरव पुरस्काराने सन्मानित करण्यात येते. अतिशय प्रतिष्ठेच्या अशा या पुरस्कारासाठी शैक्षणिक, सामाजिक, सांस्कृतिक, राजकीय, कृषी, विज्ञान, तंत्रज्ञान, उद्योग, सहकार, पर्यावरण, कला इत्यादी विविध क्षेत्रात उल्लेखनीय कार्य करणाऱ्या व्यक्तींची जीवनसाधना गौरव पुरस्कारासाठी निवड करण्यात येते.
