पुणे : मध्य रेल्वेच्या पुणे विभागाने फुकट्या प्रवाशांविरोधात कारवाईची मोहीम तीव्र केली आहे. रेल्वेने फेब्रुवारी महिन्यात २२ हजारांहून अधिक प्रवाशांवर कारवाईचा दंडुका उगारला आहे. मागील महिन्यात रेल्वेने फुकट्या प्रवाशांकडून दररोज सरासरी सहा लाख रुपयांचा दंड वसूल केला आहे. पुणे विभागात फेब्रुवारीमध्ये तिकीट तपासणीदरम्यान २२ हजार १८२ जण विनातिकीट प्रवास करताना आढळून आले. त्यांच्याकडून १ कोटी ७५ लाख रुपयांचा दंड वसूल करण्यात आला आहे. तसेच, अनियमित प्रवास करणाऱ्या ८ हजार ३९२ जणांवर कारवाई करून त्यांना ४९ लाख ९८ हजार रुपयांचा दंड ठोठावण्यात आला आहे. याचबरोबर सामानाची नोंदणी न करता तसेच घेऊन जाणाऱ्या १६५ प्रवाशांकडून १८ हजार २५०रुपयांचा दंड वसूल करण्यात आला.
ही कारवाई विभागीय रेल्वे व्यवस्थापक इंदू दुबे यांच्या मार्गदर्शनाखाली तसेच वरिष्ठ विभागीय वाणिज्य व्यवस्थापक डॉ. मिलिंद हिरवे यांच्या समन्वयाने तिकीट निरीक्षक आणि रेल्वे सुरक्षा दलाच्या मदतीने करण्यात आली. रेल्वे प्रशासनाकडून तिकीट तपासणी मोहीम सातत्याने सुरू आहे. प्रवाशांनी योग्य तिकीट घेऊनच प्रवास करावा अन्यथा त्यांना रेल्वे कायद्यांतर्गत दंड भरावा लागेल आणि दंड न भरल्यास तुरुंगवासही होऊ शकतो, अशी माहिती रेल्वेच्या वतीने देण्यात आली.
विनातिकीट प्रवासी – २२ हजार १८२
विनातिकीट दंड – १ कोटी ७५ लाख रुपये
अनियमित प्रवासी – ८ हजार ३९२
अनियमित प्रवास दंड – ४९ लाख ९८ हजार रुपये
विनानोंदणी सामान – १६५ प्रवासी
विनानोंदणी सामान दंड – १८ हजार २५० रुपये
