मुंबई : राज्यातील अंगणवाडी सेविका आणि अंगणवाडी मदतनीस यांच्या ऑक्टोबर महिन्याचे मानधन व प्रोत्साहन भत्ता अदा करण्यासाठी महाराष्ट्र सरकारने १७४ कोटी रुपयांचा अतिरिक्त निधी मंजूर केला आहे. महिला व बालविकास विभागाने २८ ऑक्टोबर रोजी यासंदर्भातील शासन निर्णय जारी केला. या निर्णयामुळे अंगणवाडी कर्मचाऱ्यांच्या मानधनासाठी आवश्यक असलेला अतिरिक्त राज्य हिस्सा उपलब्ध होणार आहे. एकात्मिक बाल विकास सेवा योजनेअंतर्गत राज्यभरातील अंगणवाड्यांमधून बालकांचे पोषण, पूर्वप्राथमिक शिक्षण आणि आरोग्यविषयक जनजागृतीचे विविध उपक्रम राबविले जातात. या योजनेंतर्गत सेविका आणि मदतनीसांना मानधन व प्रोत्साहन भत्ता देण्यासाठी केंद्र पुरस्कृत योजनेबरोबरच राज्य शासनाकडूनही आर्थिक तरतूद करण्यात येते.
शासन निर्णयानुसार, २०२६-२७ या आर्थिक वर्षासाठी अंगणवाडी सेवांसाठी २,१०० कोटी रुपयांची तरतूद करण्यात आली आहे. यापैकी यापूर्वी १,२१८ कोटी रुपये वितरित करण्यात आले असून, आता ऑक्टोबर महिन्याचे मानधन आणि प्रोत्साहन भत्ता अदा करण्यासाठी अतिरिक्त १७४ कोटी रुपयांच्या निधीला मंजुरी देण्यात आली आहे. हा निधी एकात्मिक बाल विकास सेवा योजना आयुक्तालय, नवी मुंबई यांच्या माध्यमातून वितरित करण्यात येणार असून, निधीचा विनियोग आर्थिक नियमांचे पालन करून करण्याचे निर्देश शासनाने दिले आहेत. वित्त विभागाच्या पूर्वसंमतीनंतर हा निर्णय घेण्यात आला आहे. अंगणवाडी सेविका आणि मदतनीस या महिला व बालविकास विभागाच्या योजनांच्या प्रभावी अंमलबजावणीत महत्त्वाची भूमिका बजावतात. बालकांचे पोषण, आरोग्य आणि सर्वांगीण विकासासाठी त्यांच्या सेवेला विशेष महत्त्व आहे. त्यामुळे त्यांच्या मानधनासाठी अतिरिक्त निधी उपलब्ध करून देण्याच्या निर्णयाचे स्वागत होत आहे. मात्र, शासन निर्णयात निधी मंजूर करण्यात आला असला तरी प्रत्यक्ष मानधन कर्मचाऱ्यांच्या बँक खात्यात कोणत्या तारखेला जमा होईल, याबाबत कोणतीही निश्चित तारीख नमूद करण्यात आलेली नाही.
