कल्याण : कल्याण-डोंबिवली महानगरपालिकेच्या (केडीएमसी) अधिकारी, कर्मचारी आणि कामगारांची यंदाची दिवाळी अधिक आनंदात साजरी होणार आहे. महापालिकेने कर्मचाऱ्यांना ₹२१ हजारांचा दिवाळी बोनस जाहीर केला असून, आशा सेविकांना ₹६ हजारांचा बोनस देण्याचा निर्णय घेतला आहे. आयुक्त अभिनव गोयल, महापौर हर्षाली चौधरी आणि स्थायी समितीचे सभापती मल्लेश शेट्टी यांच्या उपस्थितीत झालेल्या बैठकीत हा महत्त्वाचा निर्णय घेण्यात आला. बोनसची रक्कम दिवाळीपूर्वी कर्मचाऱ्यांच्या बँक खात्यात जमा करण्यात येणार असून, या निर्णयामुळे कर्मचाऱ्यांमध्ये समाधानाचे वातावरण निर्माण झाले आहे. म्युनिसिपल कर्मचारी कामगार सेनेचे सरचिटणीस सचिन बासरे यांनी दिलेल्या माहितीनुसार, या निर्णयाचा लाभ सुमारे ६ हजार कर्मचारी व कामगारांना मिळणार आहे. वर्ग १ व २ चे अधिकारी, सर्व श्रेणीतील कामगार, ठोक पगारी कर्मचारी, वाहनचालक, केडीएमटी कर्मचारी, महापालिका शाळांतील शिक्षक तसेच विविध आरोग्य योजनांमध्ये कार्यरत कर्मचाऱ्यांना या बोनसचा लाभ मिळणार आहे.
गेल्या वर्षी कर्मचाऱ्यांना ₹२० हजारांचा बोनस देण्यात आला होता. यंदाही त्याच रकमेचा प्रस्ताव होता, मात्र कर्मचारी संघटनांच्या मागणीनंतर बोनसमध्ये ₹१ हजारांची वाढ करून अंतिम रक्कम ₹२१ हजार निश्चित करण्यात आली. त्याचप्रमाणे, आशा सेविकांच्या बोनसामध्येही वाढ करण्यात आली असून, गेल्या वर्षीच्या ₹५ हजारांऐवजी यंदा ₹६ हजार बोनस देण्यात येणार आहे. प्रशासनाच्या माहितीनुसार, येत्या ६ नोव्हेंबरपूर्वी सर्व पात्र कर्मचाऱ्यांच्या खात्यात बोनसची रक्कम जमा केली जाईल. दिवाळीपूर्वी बोनस मिळाल्याने कर्मचाऱ्यांना सणासुदीची खरेदी आणि घरगुती नियोजनासाठी मोठा दिलासा मिळणार असल्याची भावना व्यक्त केली जात आहे.
