वृत्तसंस्था : व्हॉट्सॲप वापरणाऱ्या कोट्यवधी युजर्ससाठी आनंदाची बातमी आहे. आतापर्यंत एका ग्रुपमध्ये जास्तीत जास्त १,०२४ सदस्य जोडण्याची मर्यादा होती. मात्र, व्हॉट्सॲपने आता ही मर्यादा वाढवत एका ग्रुपमध्ये तब्बल १,५०० सदस्य सहभागी करण्याची सुविधा सुरू केली आहे. हे अपडेट अँड्रॉइड आणि आयफोन या दोन्ही प्लॅटफॉर्मवर टप्प्याटप्प्याने उपलब्ध करून दिले जात असून, ग्रुप ॲडमिनला कोणतेही अतिरिक्त सेटिंग बदलण्याची आवश्यकता भासणार नाही.
व्हॉट्सॲपमधील नव्या बदलांची माहिती देणाऱ्या WABetaInfo या संकेतस्थळानुसार, ही सुविधा जुन्या आणि नव्या दोन्ही ग्रुपसाठी लागू होणार आहे. एखाद्या ग्रुपमध्ये आधीच १,०२४ सदस्य असतील, तर अपडेट मिळाल्यानंतर त्यात आणखी ४७६ सदस्य सहज जोडता येणार आहेत. त्यामुळे नवीन ग्रुप तयार करण्याची किंवा विद्यमान सदस्यांना हटविण्याची गरज राहणार नाही. नवीन सदस्यसंख्या मर्यादा केवळ सामान्य ग्रुपपुरती मर्यादित नसून व्हॉट्सॲप कम्युनिटीमधील स्वतंत्र ग्रुपनाही लागू होणार आहे. त्यामुळे मोठ्या संस्था, शैक्षणिक गट, व्यावसायिक संघटना आणि समुदायांना एकाच ग्रुपमध्ये अधिक सदस्य जोडणे शक्य होणार आहे. गेल्या काही वर्षांत व्हॉट्सॲपने ग्रुप सदस्यसंख्या टप्प्याटप्प्याने वाढवली आहे. २०१६ मध्ये १०० वरून २५६, त्यानंतर ५१२, पुढे २०२२ मध्ये १,०२४, आणि आता १,५०० सदस्यांची मर्यादा करण्यात आली आहे. याशिवाय अलीकडेच महत्त्वाचे संदेश पिन करण्याची सुविधा, स्टेटस अपडेट शेअर करणे, मेंशन आणि रिप्लायवर आधारित संभाषण शोधणे, तसेच नवीन सदस्यांसोबत अलीकडील चॅट हिस्ट्री शेअर करण्याची सुविधाही उपलब्ध करण्यात आली आहे. या बदलांमुळे मोठ्या ग्रुपमधील संवाद आणि व्यवस्थापन अधिक सोपे व प्रभावी होणार आहे.

