पुणे : शहरातील रस्ते आणि गल्लीबोळांच्या नामकरण प्रक्रियेत पारदर्शकता आणण्यासाठी पुणे महानगरपालिकेने एक महत्त्वाचा धोरणात्मक बदल करण्याचा निर्णय घेतला आहे. या नव्या धोरणानुसार, नऊ मीटर (३० फूट) पेक्षा कमी रुंदीच्या अरुंद रस्त्यांना किंवा गल्लीबोळांना कोणत्याही व्यक्तीचे नाव देण्याऐवजी त्यांना केवळ ‘स्ट्रीट नंबर’ देण्यात येणार आहेत. या निर्णयामुळे स्थानिक पातळीवर होणारे वाद, राजकीय हस्तक्षेप आणि श्रेयवादाला आळा बसण्याची अपेक्षा प्रशासनाने व्यक्त केली आहे. शहरात वाढत्या नागरीकरणामुळे नव्या रस्त्यांची संख्या वाढत असताना, त्यांचे व्यवस्थापन सुलभ करण्यासाठीही हा निर्णय महत्त्वाचा ठरणार आहे.
या धोरणात नामकरणासाठीही कडक अटी घालण्यात आल्या आहेत. मोठ्या रस्त्यांना, चौकांना किंवा सार्वजनिक प्रकल्पांना नाव देण्यासाठी संबंधित प्रभागातील सर्व नगरसेवकांची लेखी संमती आणि किमान एका सदस्याचे अनुमोदन आवश्यक असेल. यापूर्वी बहुमतावर आधारित निर्णय घेतले जात होते, मात्र आता एकमतावर भर देण्यात आला आहे. तसेच, कोणत्याही रस्ता, उड्डाणपूल किंवा महापालिकेच्या इमारतीचे काम पूर्ण झाल्यानंतरच त्याच्या नामकरणाचा प्रस्ताव विचारात घेतला जाईल. याशिवाय, एकाच राजकीय कुटुंबातील अनेक सदस्यांची नावे विविध प्रकल्पांना देण्यावर मर्यादा आणण्याचाही विचार करण्यात आला आहे. प्रशासनाने तयार केलेले हे धोरण सध्या पक्षनेत्यांच्या समितीकडे मंजुरीसाठी पाठवण्यात आले असून, मंजुरीनंतर शहरात याची अंमलबजावणी केली जाणार आहे.
