ठाणे : महाराष्ट्र शासनाच्या कृषी विभागामार्फत शेतकऱ्यांसाठी ‘महाविस्तार एआय’ हे नवीन अॅप सुरु करण्यात आले आहे. “शेतकऱ्याचा डिजिटल मित्र” असे या अॅपविषयी वर्णन केले जाते. आपल्या शेतकरी बांधवांना आता एका अॅप मध्येच शेतीविषयक व योजना विषयक सर्व माहिती उपलब्ध आहे. या अॅपच्या माध्यमातून शेतकऱ्यांना हवामानविषयक माहिती, पिक सल्ला, पिकांसाठी लागणारी खताची मात्रा, किड व रोगाविषयी माहिती तसेच त्यांनी पिकविलेल्या मालाचा बाजारभावही बघता येणार आहे. अगदी एका क्लिकवर शेतीसाठी लागणारी यंत्र अवजारे भाडे तत्त्वावर मिळविण्याकरिता त्यांच्या गावाच्या जवळपास असणारे अवजारे बँकांची माहिती देखील या अॅपवर उपलब्ध करून देण्यात आलेली आहे.
महाडीबीटीवर असणाऱ्या सर्व योजनांची सविस्तर माहिती अर्थात त्यातील विविध घटकांकरिता अर्ज कसा करावा, आवश्यक कागदपत्रे वगैरे या अॅप मध्ये समाविष्ट आहे. ऑनलाईन शेतीशाळा, नवनवीन तंत्रज्ञानाचे व्हिडिओ देखील या अॅपच्या माध्यमातून शेतकरी बघू शकतात. याकरिता शेतकऱ्यांनी मोबाईल प्ले स्टोअरवरून “महाविस्तार एआय” अॅप डाऊनलोड करून घ्यावा. त्यानंतर आपल्या शेतकरी आयडीने लॉगीन करून आपले नाव, गाव, तालुका प्रविष्ट करायचा आहे. ज्यामुळे त्यांची गावनिहाय तालुकानिहाय सर्व माहिती त्यांना उपलब्ध होईल. या अॅपच्या होम पेजवर शेतकऱ्यांना शेतीसाठी लागणारी आवश्यक ती सर्व माहिती उपलब्ध होईल तसेच नवनवीन गोष्टीविषयी किंवा शेतकरी बांधवांच्या मनात येणारे शंका व त्यांचे विविध प्रश्न अॅपमध्ये असणाऱ्या “मला प्रश्न विचारा” येथे जाऊन आपल्या शंकांचे निरसन करू शकतात, अशा प्रकारे शेतकऱ्यांना त्यांचा शेतीविषयक एक सोबती मित्र आता त्यांच्या मोबाईलमध्ये उपलब्ध करून देण्यात आलेला आहे. तरी “महाविस्तार” अॅप प्ले स्टोअर मधून उपलब्ध करून घेवून जास्तीत जास्त शेतकरी बांधवांनी त्यावरील माहितीचा लाभ घ्यावा. तसेच या अॅपविषयी अधिक माहितीकरीता जवळच्या तालुका तालुका कृषी अधिकारी कार्यालयाशी संपर्क साधावा, असे आवाहन जिल्हा अधीक्षक कृषी अधिकारी रामेश्वर पाचे यांनी केले आहे.
