मुंबई : मतदारयादीच्या विशेष सखोल पडताळणी (SIR) प्रक्रियेवरून सुरू असलेल्या वादाच्या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी निवडणूक प्रक्रियेबाबत मोठी भूमिका मांडली आहे. सोशल मीडिया प्लॅटफॉर्म ‘एक्स’ वरील पोस्टमध्ये त्यांनी यापुढील सर्व निवडणुका इलेक्ट्रॉनिक मतदान यंत्रांऐवजी (EVM) पुन्हा बॅलेट पेपरवर घेण्याची मागणी करत, त्यासाठी देशातील सर्व विरोधी पक्षांनी एकत्र येऊन मोठे आंदोलन उभारावे, असे आवाहन केले आहे. मुख्य निवडणूक आयुक्त ज्ञानेश कुमार यांच्या कार्यपद्धतीवरही त्यांनी टीका केली असून, एसआयआर प्रक्रियेबाबत उपस्थित झालेल्या प्रश्नांमुळे निवडणूक व्यवस्थेवरील विश्वास डळमळीत झाल्याचा दावा त्यांनी केला आहे.
राज ठाकरे यांनी आपल्या पोस्टमध्ये, “एसआयआरमध्ये गंभीर घोळ झाल्याचे आरोप समोर येत आहेत. त्यामुळे ही संपूर्ण प्रक्रिया रद्द करून तिची निष्पक्ष चौकशी व्हावी आणि त्यानंतर नव्याने प्रक्रिया राबवावी,” अशी मागणी केली आहे. महाराष्ट्र नवनिर्माण सेनेचीही हीच अधिकृत भूमिका असल्याचे त्यांनी नमूद केले. तसेच, “यापुढे सर्व निवडणुका व्होटिंग मशिनवर न घेता पुन्हा बॅलेट पेपरवरच घेण्यासाठी सर्व पक्षांनी एकत्र येऊन मोठे आंदोलन उभे केले पाहिजे. त्यातूनच इतक्या वर्षांच्या सत्तेचे सत्य समोर येईल,” असेही त्यांनी म्हटले आहे. दरम्यान, राज ठाकरे यांच्या या वक्तव्यानंतर निवडणूक प्रक्रियेबाबतचा राजकीय वाद आणखी तीव्र होण्याची शक्यता व्यक्त केली जात आहे.
