मुंबई : मुंबईतील उपनगरीय लोकलमधील वाढती गर्दी आणि विद्यमान रेल्वे मार्गांच्या विस्तारासाठी उपलब्ध असलेल्या मर्यादित जागेच्या पार्श्वभूमीवर पश्चिम रेल्वेने चर्चगेट ते विरारदरम्यान भूमिगत (अंडरग्राऊंड) लोकल सेवा सुरू करण्याच्या महत्त्वाकांक्षी योजनेवर प्राथमिक स्तरावर विचार सुरू केला आहे. सध्या हा प्रकल्प प्रारंभिक टप्प्यात असून, संभाव्यता अभ्यासासाठी (फिजिबिलिटी स्टडी) रेल्वे बोर्डाकडून निधी मंजूर होण्याची प्रतीक्षा आहे. मार्च २०२६ मध्ये जारी करण्यात आलेल्या पत्रानंतर या प्रस्तावाची चाचपणी सुरू झाली असून, अलीकडे रेल्वेमंत्र्यांच्या दौऱ्यादरम्यानही या प्रकल्पाच्या आराखड्यावर चर्चा झाली. पश्चिम रेल्वेच्या अधिकाऱ्यांच्या माहितीनुसार, भूमिगत नेटवर्क तांत्रिक आणि आर्थिकदृष्ट्या व्यवहार्य आहे का, याचा प्रथम सखोल अभ्यास केला जाईल. अभ्यासाचा अहवाल सकारात्मक आल्यास पुढे सविस्तर प्रकल्प अहवाल (डीपीआर) तयार करण्यात येईल. त्यामुळे सध्या या प्रकल्पाच्या अंमलबजावणीची कोणतीही निश्चित कालमर्यादा जाहीर करण्यात आलेली नाही.
सध्या पश्चिम रेल्वे चर्चगेट–विरार मार्गावर दररोज सुमारे १,४१४ लोकल फेऱ्या चालवते. मात्र, भूमिगत रेल्वे मार्ग उभारणे हे तांत्रिक आणि आर्थिकदृष्ट्या मोठे आव्हान मानले जात आहे. दाट लोकवस्तीखाली बोगदे खोदणे, भूमिगत स्थानके उभारणे, त्यासाठी आवश्यक निधी उपलब्ध करणे तसेच स्थानकांसाठी प्रवेश-निर्गमन व्यवस्था निर्माण करणे ही प्रमुख आव्हाने असतील. याशिवाय, नव्या भूमिगत मार्गाची विद्यमान रेल्वे नेटवर्क आणि मुंबई मेट्रोशी प्रभावी जोडणी करावी लागणार आहे. दरम्यान, मुंबई रेल्वे विकास कॉर्पोरेशन (एमआरव्हीसी) देखील आंतरराष्ट्रीय संस्थेमार्फत चर्चगेट–विरार आणि छत्रपती शिवाजी महाराज टर्मिनस–परळ या दोन संभाव्य भूमिगत रेल्वे कॉरिडॉरचा स्वतंत्र अभ्यास करत आहे. या सर्व अभ्यास अहवालांनंतरच प्रकल्पाच्या पुढील दिशेबाबत अंतिम निर्णय घेतला जाणार आहे.
