मुंबई : बॉलिवूड अभिनेता अजय देवगण याच्या जुहू परिसरातील मालमत्तेवर सुरू असलेल्या सलून आणि स्पा प्रकल्पावरून नवा वाद निर्माण झाला आहे. जुहूतील कपोळ को-ऑपरेटिव्ह हाउसिंग सोसायटीमधील बंगल्यात सुरू असलेल्या कामाबाबत रहिवाशांनी आक्षेप घेतल्यानंतर मुंबई महापालिकेच्या के-वेस्ट विभागाने संबंधित मालमत्तेला ‘स्टॉप वर्क’ नोटीस बजावली आहे. पालिकेच्या माहितीनुसार, या जागेचा व्यावसायिक वापर करण्यासाठी आवश्यक परवानगी घेण्यात आल्याची नोंद उपलब्ध नसल्याने संबंधितांकडून कागदपत्रे मागवण्यात आली होती. मात्र, ती वेळेत सादर न झाल्याने काम तात्पुरते थांबवण्याचे आदेश देण्यात आले. सोसायटीच्या म्हणण्यानुसार, अजय देवगण यांनी आपली ही मालमत्ता भाड्याने दिली असून तेथे सलून आणि स्पा सुरू करण्याची तयारी सुरू होती. निवासी सोसायटीतील जागेचा व्यावसायिक वापर करण्यास कायदेशीर परवानगी आहे का, याबाबत रहिवाशांनी प्रश्न उपस्थित केला आहे. यासंदर्भात सोसायटीने देवगण कुटुंबाला लेखी पत्र पाठवून आवश्यक परवानग्या आणि कागदपत्रे सादर करण्याची मागणी केली होती. मात्र, त्यांच्या म्हणण्यानुसार त्यावर कोणताही प्रतिसाद मिळाला नाही. त्यानंतर सोसायटीने ही बाब महापालिकेकडे मांडली आणि त्यानंतर प्रशासनाने कारवाई करत ‘स्टॉप वर्क’ नोटीस बजावली.
दरम्यान, या प्रकरणावर अजय देवगण यांच्या कुटुंबानेही आपली भूमिका स्पष्ट केली आहे. देवगण यांच्या टीममधील चीफ लीगल अँड कम्प्लायन्स ऑफिसर रुचि कनोजिया यांनी सांगितले की, संबंधित जागेच्या प्रस्तावित वापरासाठी आवश्यक असलेल्या सर्व परवानग्या आणि मंजुरी संबंधित शासकीय अधिकाऱ्यांकडून नियमांनुसार घेण्यात आल्या आहेत. तसेच या प्रकरणात उत्तर सादर करण्यासाठी चार आठवड्यांची मुदतही मागण्यात आली असल्याची माहिती समोर आली आहे. हे प्रकरण आता सहकारी गृहनिर्माण विभागापर्यंत पोहोचले असून तक्रारीच्या आधारे पुढील कायदेशीर प्रक्रिया सुरू आहे. या वादाचा केंद्रबिंदू मालमत्ता भाड्याने देणे नसून निवासी परिसरातील जागेचा व्यावसायिक वापर करता येतो का, हा आहे. सोसायटीचा दावा आहे की, नागरी तसेच इतर आवश्यक कायदेशीर परवानग्यांशिवाय अशा प्रकारचा व्यावसायिक वापर करता येत नाही. दुसरीकडे, देवगण कुटुंबाने सर्व मंजुरी घेतल्याचा दावा केला आहे. त्यामुळे आता संबंधित कागदपत्रांची पडताळणी, महापालिकेचा अहवाल आणि पुढील प्रशासकीय निर्णय यावर या प्रकरणाचे भवितव्य अवलंबून असणार आहे.
